Articles by: 尉遲一

英雄所見樂瞳 至Goal Club免費派揮春
by / on 06/02/2018 at 12:00 am

英雄所見樂瞳 至Goal Club免費派揮春

好事呀,樂瞳寫真集《See La Cilla》重新加印上架,早幾日仲去埋「至Goal Club」搞簽名會宣傳,成件事直頭雙贏喇。開心事唔好停,「至Goal Club」老闆決定免費送出「英雄所見樂瞳」賀年揮春,係,唔使幫襯,係直接派,同老闆講聲多謝,順便講多句賀年說話喇,就可以免費擁有嘞。除咗多謝老闆,我哋都好應該多謝神奇小子陳奇源,因為揮春就係出自佢手筆嘞,多謝晒。 相關資訊買嚟儲 《第37屆香港電影金像獎特刊》$98 (Apr 17, 2018) 《古惑仔》送財神揮春 陳浩南重遇采妮好有Mood (Feb 14, 2018)

Read more ›

買《山海逆戰》3D特別版 送揮春
by / on 02/02/2018 at 6:43 pm

買《山海逆戰》3D特別版 送揮春

弊,唔知送晒未呢?想要就真係要快喇,依家去「收藏家港漫專區」,幫襯《山海逆戰》第62期3D特別版,即送賀年揮春一張。揮春有兩款,分別係寫住「身壯力健」嘅姚星塵版本同寫住「百年好合」嘅殷天翔+傲嵐版本。喂,得六十份咋,真係要搶架。

Read more ›
樂瞳現身「至Goal Club」簽名 寫真集《See La Cilla》重新上架
by / on 02/02/2018 at 5:16 pm

樂瞳現身「至Goal Club」簽名 寫真集《See La Cilla》重新上架

一石激起千重浪,早前「至Goal Club」老闆新哥接受傳媒訪問,言談間指靠兼賣寫真集撐起舖頭,而最好賣嘅樂瞳寫真集《See La Cilla》更加斷市,有唔少讀者追問有無新貨云云。有見及此,新寫真集將會重新上架,而樂瞳亦會喺嚟緊嘅禮拜日,現身「至Goal Club」同大家簽名影相留念。飛雲,機會嚟喇,想一睹樂瞳風采,周日上一趟信和喇唔該。 相關資訊幫襯至Goal Club/食車仔麵 送甘小文《至Goal 12球星月曆》 (Jan 5, 2018) 甘小文2018《奔走行月曆》開訂 (Jan 3, 2018)

Read more ›
《漫畫Buddy》第四期釋出封面 小甜健畫埋一份
by / on 26/01/2018 at 8:30 pm

《漫畫Buddy》第四期釋出封面 小甜健畫埋一份

之前介紹過嘅《漫畫Buddy》第四期釋出封面,仲有幾個故事簡介,包括陳志恆同陳志祥合著《逆天‧楚漢》、阿恩《海武》、海仔老師《倒立英雄》、鄧俊棠《天姬戰》同埋李偉健《小太監大戰鐵布衫》。李偉健即係小甜健,亦即係《愛回家》嗰個Terry呀,今次佢都畫埋一份,仲有埋佢嘅專訪添。全書168彩色印刷,每本$98,2月初見街,支持本地創作,要課金捧場呀。 相關資訊《漫畫Buddy》第二期今日見街 送貼紙每本$72 (Jan 10, 2017) 《漫畫Buddy》即日開訂 送袁家寶創刊賀卡 (Jun 24, 2016)

Read more ›
《新著龍虎門》重用三招了舊橋 老妖「神經病」忽然說教?
by / on 26/01/2018 at 7:45 pm

《新著龍虎門》重用三招了舊橋 老妖「神經病」忽然說教?

今期第924期《新著龍虎門》,我睇到笑出聲。話說老妖惡鬥甚麼鷹爪門主,兵凶戰危間,老妖竟然話:「我有話說,雖然應該是白說的!我老妖是過來人,為錢為非作歹,沒好下場!」卻換來對手一句:「神經病!」梗係神經病啦大佬,劈緊友呀依家,打到一身血先嚟無端端說教,這是甚麼神邏輯?唔知仲以為佢係社工。另外,韋陀戰燕長空一戰,玩各打對手三招唔還手,韋陀先打,燕長空憑玄氣經捱得過,到燕長空打,韋陀憑九霄真經勉強頂得住,點知燕長空食言還拖。其實呢種打法之前舊著都玩過,無記錯的話,應該係蚩尤對龍貫天,一人一招輪流打對手,打打吓龍貫天笠水還拖,最後俾蚩尤一招雷霆擊鼓KO,不過講到嗰種血肉橫飛嘅畫面迫力同針鋒相對嘅對白咯喎,就真係新不如舊咯,舊著睇得人肉緊好多。 相關資訊恭喜晒!《新著龍虎門》金神魔君+極樂魔僧死得好! (Apr 16, 2018) 《新著龍虎門》讀者提出「龍虎十大主將表」 王小鷹做老一? (Mar 12, 2018)

Read more ›
Eric Ng又送年糕畀老人家 畫手繪畫盒面抵讚(二)
by / on 26/01/2018 at 6:21 pm

Eric Ng又送年糕畀老人家 畫手繪畫盒面抵讚(二)

好人好事繼續表揚,話說Eric Ng邀請畫手繪畫年糕盒面貼紙,打算製作年糕送畀長者,最新輪到Yeung Siu、lolohoihoi、花生粉上的糯米糍、張君豪、Itchyhands Winglo、米大可同Lai Chi Cheong出手喇,請大家細心欣賞,睇完唔該鼓掌,啪啪啪啪啪! 相關資訊記得打卡 《Project 72》畫展作品現身中環街市 (Feb 27, 2018) 張君豪送賀年Postcard 蛋散變英雄 (Feb 7, 2018)

Read more ›

買《山海逆戰》送2018年曆卡
by / on 25/01/2018 at 9:45 pm

買《山海逆戰》送2018年曆卡

先替廣大港漫迷多謝邱福龍,再要多謝「收藏家港漫專區」Dicky,事關依家上舖頭幫襯任何期數或版本嘅《山海逆戰》,即送2018年曆卡一張,物輕情意重,送完即止,想要唔該快手。 相關資訊邱福龍元祖版《鐵將縱橫》6月出版 (May 16, 2018) 福龍出席Toys Collector Market玩具收藏家販售展 談玩具經 (Apr 18, 2018)

Read more ›
《火武耀揚》汗青超重口味床上戲 道理哥終於醒番
by / on 25/01/2018 at 9:18 pm

《火武耀揚》汗青超重口味床上戲 道理哥終於醒番

今期第953期《火武耀揚》睇到我嘩嘩聲,邱瑞新久唔久就曬鹽花,呢招唔出奇,出奇在竟然如此重口味,安排汗青同一個肥婆交配,啲肢體動作仲要畫得極其露骨,甚麼五十路呀、肥痴女呀嘅日本怪癖類AV味道完全出晒嚟,我坐地鐵睇書,登時覺得有啲尷尬。今期除咗妖女搶眼外,丹心表現都唔差,估唔到佢手底功夫咁好,下下分筋銼骨,打到班新記爛仔斷手斷腳。咁當然,最震撼係道理哥醒番喇,我幾驚呢個角色以後都唔出場呀,你知喇,瑞新啲伏線有時伏伏吓會伏到無影架嘛。 相關資訊《火武耀揚》明寸權貴 佳哥甩鼻血腥美學 (May 3, 2018) 《火武耀揚》巨咪三頁高三吋 佳哥復出歸邊赤柱同盟 (Apr 16, 2018)

Read more ›
三聯書店x曹志豪《死角》 即場繪畫分享會
by / on 25/01/2018 at 8:00 pm

三聯書店x曹志豪《死角》 即場繪畫分享會

曹志豪本圖文小說《死角》,我有捧場,坐茶餐廳一個鐘頭零三個字一氣呵成睇晒,感覺著實唔錯,如果結局係李承東、姜秀賢同歐陽駿譜出三角戀,兄弟情加愛情加拳擊運動,我諗會更過癮,諗諗出續篇都仲得喎。哎,扯遠咗添,入番正題,曹志豪喺嚟緊周六搞即時繪畫會,地點係三聯書店,講到明歡迎任何人士進場參加。想搵佢簽番個大名,呢個係機會嘞。 相關資訊《古惑仔》送潮爆貼紙 No輝唔係斷咗手咩? (Mar 2, 2018) 曹志豪x柏原太賀《死角》分享會 (Feb 8, 2018)

Read more ›
黃水斌《英雄本色電影鋼筆手繪漫畫》再版 至Goal Club開訂
by / on 25/01/2018 at 7:41 pm

黃水斌《英雄本色電影鋼筆手繪漫畫》再版 至Goal Club開訂

後悔之前懶,無落訂黃水斌《英雄本色電影鋼筆手繪漫畫》,依家個個面書朋友仔都有得睇,睇完又影相掟上網,我卻只有心心眼的份兒,仲要全部售罄添,慘喇呢次。好彩,黃水斌決定再版,呢個禮拜六,點都要出MK一次,上「至Goal Club」搵新哥落訂先得,黑白硬皮封面每本$98,呢一舊水,無得慳呀。

Read more ›
戊戌迎新賀年市集 漫畫家駐場寫揮春
by / on 24/01/2018 at 3:45 pm

戊戌迎新賀年市集 漫畫家駐場寫揮春

想率先感受新年氣氛的話,2月10日可以去觀塘走一趟喎,處身工廈嘅「SAAL」會舉辦「戊戌迎新賀年市集」,到時阿柱@OIC親子丼、阿塗、肥佬、Yoda Factory、周小某、大Y、細Y等漫畫家會駐場,賣自家精品兼幫手寫揮春同畫畫,聽講屆時仲有專人煮嘢食,提供埋食物,正宗有得食有得玩有得買,開心喇喂。 相關資訊戊戌迎新賀年市集 鵝王Cliffy出迷你揮春好老利 (Feb 7, 2018)

Read more ›

丟那星賀年揮春+利是封+貼紙 我真係恭喜你呀!
by / on 24/01/2018 at 1:59 pm

丟那星賀年揮春+利是封+貼紙 我真係恭喜你呀!

倒數中喇,仲有唔夠一個月就農曆新年喇,我好期待呀,「丟那星」呢堆賀年精品,唔知啱唔啱大家心水呢?依家逐樣同你數,主要分以下三大類別──「小人退散+人人有腦用」揮春一套兩款$38、「我真係恭喜你呀」利是封一包10個$38、「小人退散+人人有腦用」貼紙一套兩款$20,散買可以,唔同類別Mixed埋嘅套餐亦有。啲口號咁啜核,點只恭喜你,直頭笑死你呀。 相關資訊復刻《龍虎門》貼紙 石黑龍原來有英文名 (Apr 28, 2018) 日本拒絕上門銷售怪招 貼亂碼貼紙好有效 (Apr 18, 2018)

Read more ›
《綁靈》1月出版 謝森龍異封面x潘紹聰監製
by / on 23/01/2018 at 9:13 pm

《綁靈》1月出版 謝森龍異封面x潘紹聰監製

創造館出書都好密吓,本《異人》仲擺咗喺背囊未睇晒,話咁快1用尾又話出新書《綁靈》,咁出多啲書,又絕對係好事嚟嘅。新書叫《綁靈》,由《恐怖在線》鬼王潘紹聰監製,一樹著,內容圍繞香港都市傳說,以地綁靈即係死咗都唔肯離開一個地方、非常執著嘅怨魂野鬼為中心。暫時未知賣幾錢,一月下旬見街,最重要係由謝森龍異畫封面,我Like謝森龍異手畫,好難唔撐。 相關資訊喪屍圍西貢 創造館小說《異人》不日推出 (Nov 2, 2017) 跟進番:謝森龍異唔願送劣作 睇咗當擁有咗 (Sep 6, 2017)

Read more ›
香港反虐日 張君豪作畫為貓狗發聲
by / on 23/01/2018 at 8:45 pm

香港反虐日 張君豪作畫為貓狗發聲

原來今日係「香港反虐日」,從來覺得虐畜係弱者最下賤所為,所以縱使我唔係貓奴狗奴,都覺得應該支持。響應方法好簡單,Copy一段文字加張貓狗相,貼喺自己面書,就等同替貓狗發聲,希望香港真正能夠成立到「動物警察」同制定到「動物保護法」。而為此,張君豪亦作畫一張以作呼籲,呢個蛋散咁有愛心,抵讚。係,或者你會話係個意貼個Post無乜實際作用,但姿態嘅嘢,啱就要擺;立場嘅嘢,最緊要明確,呢個響應活動,係值得大家參與嘅。 相關資訊貓奴要去 日本超正旅館有貓入房陪玩 (May 21, 2018) 【新片速報】日本喵星人出動 牛仔褲「貓鬚」製造工場 (May 20, 2018)

Read more ›
讀者熱烈討論 《古惑仔》牛姑使唔使死?
by / on 23/01/2018 at 7:45 pm

讀者熱烈討論 《古惑仔》牛姑使唔使死?

今期第2098期《古惑仔》書名真係何其浪漫與悲壯,叫〈我死也為了她!〉,「她」指潘少枝,為佢死嘅係牛姑。故事講到三聯九尾狐同建興擺局,搞到洪興李志高同牛姑無端端打餐死,牛姑寡不敵眾,攬住自己個女人瘋狂捱斬。畫到呢段,網民熱烈討論牛姑使唔使死,我呢,就認為唔會,一,每逄一個重要角色死,牛佬都或多或少會喺自己專欄事先張揚,今次唔覺;二,牛姑應該仲有大把戲可以寫,佢應該係激起三聯同洪興鬥個你死我活嘅催化劑,呢個催化劑暫時好明顯未用盡;三,都未見牛姑嘅「往事回憶」,所以應該未死得住。執筆至此,我反而有個不祥預兆,唔知點解,我覺得李志高反而會打柴,仲要死得好無厘頭嗰隻,希望估錯喇。 相關資訊《古惑仔》新專欄「百戰話當年」 當海報儲 (May 7, 2018) 《古惑仔》佐維談公道 牛佬談世道 (May 3, 2018)

Read more ›