潮玩新聞

獵奇喪屍香水   枯葉/霉菌/青苔精心提煉
by / on 12/03/2013 at 8:03 am

獵奇喪屍香水 枯葉/霉菌/青苔精心提煉

唔係啩,喪屍都用香水?我覺得電影《熱血喪男》嗰個憂鬱男喪屍實會日日噴。唔係講笑,呢款香水由外國香水公司DEMETER製造,仲有男女裝,用枯葉、霉菌、蘑菇、苔蘚、泥土等配料提煉,1公士裝賣美金$20;想日日噴可以買4安士裝,開價美金$40。女裝味道據稱會淡啲,如果用完可以令喪屍行過都唔會發現,我實買,因為我相信自己扮喪屍行路實穿崩嘅。  相關資訊喪屍圍西貢 創造館小說《異人》不日推出 (Nov 2, 2017) 【有片】超有氣氛 山梨縣「小菅村」變喪屍村落 (Oct 23, 2017)

Read more ›

星戰x Zeon手錶系列   推介黑武士/Skywalker
by / on 12/03/2013 at 7:50 am

星戰x Zeon手錶系列 推介黑武士/Skywalker

上年日本精工同Star Wars出嘅手錶,R2-D2嗰款長炒長有,而家仲賣緊過萬蚊港紙!啱啱另一手錶品牌Zeon亦宣佈推出Star Wars手錶系列,今次唔玩鋼帶玩皮帶,一套五款,有齊R2-D2、Skywalker、白兵、Boba Fett,當然唔少得大家最冧嘅黑武士,黑武士嗰款仲要係黑錶帶紅錶面,型!開價港幣$1500左右,每隻有獨立編號,唔算貴,不過我最鍾意反而係Skywalker嗰款,有埋指南針,低調得嚟夠detail。 相關資訊【有片】東京大雪新宿直播 謎之男瘋狂出現 (Jan 23, 2018) 【有片】真正死亡遊戲 日本機迷玩自虐Game (Jan 23, 2018)

Read more ›
日本街霸格鬥服 連體情侶裝
by / on 11/03/2013 at 9:09 pm

日本街霸格鬥服 連體情侶裝

上年年尾,reversal.dogi.design.works X Street Fighter嘅第1彈服裝已經推出咗,嚟緊就係第2彈。老實講呢幾款Tee呀、衛衣呀的確係幾靚仔,最正一件係阿隆出波打Blanka嘅經典場面,一人一件,咪可以情侶裝?但係,兩件都好似係男裝嚟…… 相關資訊咩事呢?街霸 x 變形金剛 春麗變架車 阿隆變飛機 (Nov 22, 2017) 【有片】親身拆車 《Street Fighter II》打車關卡玩VR (Nov 19, 2017)

Read more ›
自己的事自己做 日本最新模型 懷舊震蛋親手砌
by / on 11/03/2013 at 8:38 pm

自己的事自己做 日本最新模型 懷舊震蛋親手砌

求人不如求己嘛,有啲嘢,都係自己玩開心啲。例如模型吖,自己一手一腳砌出嚟,比起完成品更加精細更加有滿足感。好喇,咩叫震蛋?唔知嘅留言,我哋會有專人答覆你嘅疑問,簡單啲講,就係一件好貼身嘅用品,咁日本就啱啱出咗盒模型,嘩個盒好似70年代啲機械人模型咁,賣630円,入面有齊晒所有配件,砌完之後……我諗最好打磨吓同補埋畢地,同埋最緊要係剪好啲啲水口位,如果唔係……嗚! 相關資訊日本舊式模型舖結業 全店半價再見舊情懷 (Nov 26, 2017) 【有片】日本外務省官方出片 介紹模型歷史文化 (Nov 24, 2017)

Read more ›
新圖發佈《Gundam Breaker》模型大戰黐水貼 Master Gundam現身
by / on 11/03/2013 at 6:04 pm

新圖發佈《Gundam Breaker》模型大戰黐水貼 Master Gundam現身

PS3/PS Vita《Gundam Breaker》呢隻玩高達模型大戰嘅遊戲,今年內會推出,仲宣佈會有體驗版配信,加埋大量內容情報。最好玩係喺模型枱上面激戰,側邊係啲噴罐呀、畫筆呀,好正!仲有就係Master Gundam同Freedom Gundam現身,出擊之前可以揀高達頭渣古手,仲可以揀水貼嚟裝飾機體!真係幾有新鮮感! 相關資訊新片速報 PS4《New Gundam Breaker》公開 官網開張 (Jan 16, 2018) 新片速報 PS Vita/PS4《Gundam Breaker》13分鐘共鬥試玩片 (Mar 1, 2016)

Read more ›
體積大三倍《鐵拳浪子》《筋肉人》《巨人之星》國民漫畫家版桃哈多
by / on 11/03/2013 at 4:14 pm

體積大三倍《鐵拳浪子》《筋肉人》《巨人之星》國民漫畫家版桃哈多

早一兩年都已經推出過嘅國民漫畫家系列桃哈多粟米條,嚟緊3月25日又會推出期間限定新版本!今次有3款,分別搵嚟《巨人之星》嘅川崎のぼる、《筋肉人》嘅嶋田隆司同埋我最想要嘅《鐵拳浪子》千葉徹彌作畫畫包裝,超正!而且裏頭嘅粟米條仲要係比平常嘅大3倍!諗起都想食!到時要巡多啲阿信屋先得! 相關資訊【有片】《鐵拳浪子》連載50周年計劃 新動作《MEGALO BOX》下年開播 (Oct 13, 2017) 假肌肉衫網上有得賣 24個款式呎吋顏色任揀 (May 10, 2015)

Read more ›

獵奇影片 神奇柴犬 主人恰眼瞓 射水射醒佢!
by / on 11/03/2013 at 3:07 pm

獵奇影片 神奇柴犬 主人恰眼瞓 射水射醒佢!

日本啱啱過咗考入學試嘅時期,咁讀書考試就梗係要捱眼瞓最後衝刺。日本就有個主人教識佢隻柴犬,喺佢溫溫吓書恰眼瞓嘅時候按掣射水射醒自己。超無聊,但超可愛,我諗阿柴犬都應該唔係好知主人點解要教佢射水,不過射完應該有嘢食……下次不如玩大啲,教佢小便落你個頭度吖? 相關資訊【有片】日本柴犬出名唔肯返屋企 散步期間瞓咗 (Jan 22, 2018) 【撞樣】日本柴犬超似冬甩 一臉雪超可愛Twitter熱傳 (Jan 13, 2018)

Read more ›
滑鼠減肥法 日Click兩千下
by / on 11/03/2013 at 2:58 pm

滑鼠減肥法 日Click兩千下

你有冇肥胖嘅煩惱?係咪工作好忙日日對住電腦冇時間做運動?有冇諗過Click吓個Mouse會消耗幾多個卡路里?日本有個統計,就係一個成年男人,每日應該消耗2,000個卡路里,而女性就要1,700卡路里,咁Click一下Mouse會消耗幾多?答案係1.42。即係如果你一日Click兩千下,咁咪OK?不過你可能只有手食指同中指嘅肌肉比較發達,視乎你Copy & Paste得多唔多……   相關資訊合味道杯麵變豆腐 超低卡路里減肥都啱 (Aug 13, 2017) 鍵盤戰士有嘢食 Keyboard窩夫配滑鼠麵包好飽肚 (Sep 25, 2015)

Read more ›
獵奇發明        透明單車神化發明家
by / on 11/03/2013 at 7:20 am

獵奇發明 透明單車神化發明家

有啲設計真係好獵奇,好似呢架由外國人Jimmy Kuehnle設計嘅透明單車,除咗車軚、鐵鍊同埋腳踏位,基本上全架都係透明,而設計師亦刻意著晒透明雨衣踩住佢出巡。不過我反而想知點解佢個頭縛晒電線咁神化,同埋好彩佢條底底唔係透明嘅。呢位神人仲設計過膠單車、Drawing Bike同埋好多新奇刺激嘅奇特發明,堪稱獵奇發明家。 相關資訊【浪漫】踩400km單車去C93 日本畫師/Coser愛知縣出發去東京 (Dec 30, 2017) 馬榮成製作單車衫 聶風+步驚雲教你安全知識 (Dec 24, 2017)

Read more ›
本周Coser 露出系Kibashi 長腿踩過界
by / on 10/03/2013 at 5:25 pm

本周Coser 露出系Kibashi 長腿踩過界

呢個日本Cosplayer叫Kibashi(キバシ),佢最鍾意係Cos《一騎當千》,咁就啱啦,我最鍾意睇。搵完佢嘅資料之後發現原來佢喺日本除咗玩Cosplay影啲露出度極高嘅靚相之外,仲有出DVD,而啲DVD睇封面都知加非常踩界,有著校服有戴眼鏡仲勁有SM Feel,嘩!咁都係15+,但係AV又反而要打格仔,日本嘅呎界真係好有彈性。話時話,佢話自己身高係170 -175cm,難怪對腳咁長。 相關資訊【有片】我都想玩到70歲 新加坡最年長Cosplay (Jan 22, 2018) 本周Coser 日本「オシリス Osiris」《Gantz》女角冇得輸 (Jan 21, 2018)

Read more ›
新片速報 網上遙距夾公仔 100円次 安坐家中能夾天下事
by / on 10/03/2013 at 5:05 pm

新片速報 網上遙距夾公仔 100円次 安坐家中能夾天下事

上年年尾已經報導過日本Netch會推出網上夾公仔遊戲,啱啱就正式推出,仲有埋片示範教你點夾先係醒。網上夾公仔有咩好呢?夾得差唔怕俾人睇到啦,24小時都可以夾啦,唔使出街啦,夾到佢仲會寄埋份禮物嚟啦,其實都幾爽。o依家個網有40種景品揀,都係啲大路嘢,香港玩唔玩到?暫時只係接受日本國內登記,100円一次,不過佢話遲啲會出埋Android版本,仲會加到有500部夾公仔機放喺公廠大廈自動運作,到時可能接受海外玩家都唔定。 相關資訊【有片】終於成功了!夾公仔機 + 汽球被成功破解! (Sep 4, 2017) 【有片】又玩人!日本夾獎品機彈力啱啱好 (Jul 30, 2017)

Read more ›

新片速報 《機動戦士ガンダム》彈珠機 土田晃之CM全機體出動
by / on 10/03/2013 at 4:19 pm

新片速報 《機動戦士ガンダム》彈珠機 土田晃之CM全機體出動

之前都報導過,嚟緊如果你4月中去日本旅行,經過啲彈珠機店一定會見到全部貼晒高達海報,因為SANKYO將會推出「フィーバー 機動戦士ガンダム」柏青哥彈珠機。內容有元祖《機動戰士Gundam》劇場版3部曲「機動戦士ガンダム」、「機動戦士ガンダムII 哀・戦士編」同「機動戦士ガンダムIII めぐりあい宇宙(そら)編」,而土田晃之大叫「o依KI媽S」嘅廣告之前睇咗兩條,今次就有大集合,高達、紅綠渣、強人等機體,隻隻都俾佢嗌到出晒嚟!你頂到幾多隻?如果你唔飛住睇都睇得好開心兼睇完再睇,得喇,你係忠心fans,可以移民去殖民星,嗰邊排隊。 相關資訊【台場大雪】真正白色獨角獸 雪中爆甲超有型 (Jan 22, 2018) 日本投選 Gundam史上個樣最可愛女角 (Jan 20, 2018)

Read more ›
Google吹水鞋   跑步打籃球自動share
by / on 10/03/2013 at 1:31 pm

Google吹水鞋 跑步打籃球自動share

Google繼眼鏡之後,今次轉玩波鞋;你話,Nike都出過啦,識check步速嗰款嘛。呢對Google吹水鞋(Talking Shoes)又有啲唔同喎,因為佢識自動自覺幫你寫潮文post上網,仲係以波鞋第一身角度share。舉例,你著住對鞋坐喺度唔郁,佢會話:「好悶!」;你跑步時,佢又會話:「啲風吹過我條鞋帶好爽。」之類。當然,佢出post前會問吓你,唔敢自把自為。款式方面,概念片入面係Adidas經典三間款,換上Google色系。由設計師Zach Lieberman及YesYesNo合作設計,對鞋仲內置計步器、壓力感應器、喇叭、藍芽等。Google已經舖咗新片上YouTube,想感受對波鞋有幾吹得,可以上去睇睇。 相關資訊日本網民又發現 Google地圖電單車炒車意外 (Oct 20, 2017) 新日本製鐡所 Google 3D地圖似幅畫 (Sep 15, 2017)

Read more ›
獵奇新片 Bandai出鬼影變幻球 人人都係大空翼
by / on 10/03/2013 at 1:13 pm

獵奇新片 Bandai出鬼影變幻球 人人都係大空翼

比賽o依家先啱啱開始咋!我諗極都諗唔明,細個點解可以捱到追睇動畫版《足球小將》,睇見戴翅偉即係阿大空翼射球波,起腳要半集時間,影個波飛去龍門隨時就一集,之後守門員又諗嘢又回憶又講幾句,最大鑊係唔入,咁就搞咗兩三集……好喇,Bandai o依家俾個機會大家做主角,喺3月尾就會推出呢個鬼影變幻球,因為波入面有嚿重120g嘅嘢墜埋一邊,所以只要你識起腳踢起個波,個波隨咗會係香蕉波之外,仲會不規則咁郁動,入嚟睇片就知幾勁。賣2,100円,抵啦!林源三都冇你符。 相關資訊【有片】假面製造本地英雄 香港「守武者-夢翔」 (Jan 4, 2018) 【唔駛Plus】《Monster Hunter: World》第二次Beta 其實自己一個過聖誕更開心 (Dec 16, 2017)

Read more ›
獵奇產品 無限泡泡紙iPhone 5殼
by / on 10/03/2013 at 11:54 am

獵奇產品 無限泡泡紙iPhone 5殼

泡泡紙,即係我哋買啲貴重嘢,咪有層泡泡紙包住嘅?就係嗰張喇,細細個你最鍾意拎嚟啪啪啪嗰張呀!雖然大個咗我知你哋鍾意啪啲有血有肉嘅嘢,但日本人就一向念舊,曾幾何時都推出過無限泡泡紙、無限枝豆呢啲玩意。今次就套用喺iPhone殼身上,殼嘅背部全部都係無限啪啪紙,睇過條片你就知有幾爽,個用家個樣有幾嘆!2,100円,香港快啲入貨啦!雖然我唔係用iPhone,但戥你哋開心嘛! 相關資訊【有片】靚喎!iPhone電話座 扮懷舊電視 (Sep 18, 2017) 【相集】日本京都懷舊小店 過200張iPhone拍攝全紀錄 (Sep 16, 2017)

Read more ›