主頁, 人物專訪, 專題熱話, 遊戲新聞 — 10/11/2012 at 9:19 pm

人物專訪 伍公子認真mode:「希望興趣搵到食。」

by

擷取

為免被受訪者投訴我唔揀張靚仔相嚟做大相,我花咗好多時間喺段片入面捕捉佢呢個感性托下巴一刻。加埋背後盞射燈,呢個氛圍,最適合就係傾一啲正經而沉重嘅話題,例如拍片搵唔搵到食。伍公子拍打機片把口寸寸貢,實質份人感覺幾踏實、準時,身高180cm、唔算囂張唔算輕浮,成個訪問走粗口,打住機對答都到point有紋路,轉數高。

剪片同事問我伍公子用咩Title好,我諗咗好耐,機迷?拍片人?演員?主持?網絡紅人?咩係網絡紅人?又要解釋多次,即係出段片過一晚夜就有幾萬views,喺facebook打個乞嚏都有三兩千個like嗰啲。我嘗試睇吓佢facebook個profile,佢話自己係一碌型棍,一位公子,一塊老餅同一條賤人,仲有……我搵到喇,係製作人!可惜我搵到時同事已收工,所以,叫咗佢做YouTube機迷。係,以上呢堆字我純粹都係打定底,到時俾人寸冇咁痛。

約伍公子好爽快,幾個whatsapp搞掂時間地點,訪問當日,佢冇年輕人嘅遲到習慣,準時由新界區遠赴中環。訪問當日係《刺客教條 3》推出嘅日子,就要佢邊打機邊做訪問,對佢嚟講,係冇乜難度。「睇吓打咩game啦,我拍片前就都盡量唔會玩一次先,咁樣打落會感覺好啲,所以,成日死。」盡量保持每一日出一條片,目標好明確,冇扭擰冇眼望遠方講夢想:「希望可以做啲有興趣嘅嘢,又搵到食。你問我未來大計,我真係冇乜計劃。拍打機片係我o依家嘗試緊嘅方向,都未知得唔得。」雖然冇具體答案,但感覺又好踏實,真係奇。

即場試玩錄一段,奇怪喇,好似爭少少嘢,冇錯,冇粗口。「你係咪要我講吖?其實我本身唔係好爛口,係有啲位拍片講粗口個氣氛會好啲,大家又會睇得投入啲。」唔明點解,但呢個又真係事實,呢個現象其實唔只出現喺網上YouTube片,我睇《春嬌與志明》時已經發覺,片中人講親粗口,我旁邊啲靚仔靚女都會嘻嘻笑,都真係幾X好笑。講番轉頭,暗藏嘅道理即係佢拍片唔係隨口o翕,你哋睇片睇到嘅笑位,係度過嘅。

講到近年香港冒起好多拍片單位,伍公子話:「好呀,多啲人玩先可以造到個潮流出嚟。其實,我哋呢班拍片人叫造有啲人識,都要多謝無綫嘅。」認同,啲劇夠膠嘛。不過人多就有競爭,我八卦少少,問多兩句,前排仲好似同高登打機拍片紅人達哥唔多妥?「哦,其實冇嘢,我知達哥係邊個,但大家唔認識,不過,佢拍啲片幾好睇。之前其實係大家啲觀眾有啲拗撬,我同佢冇嘢。」

其他問題條片度都拍晒,最後叫佢同機迷講兩句說話,尤其認真,例如打機打到會考英文Level 5,都係肺臟之言呀。

我以前細個阿媽冇鬧過我成日打機,仲買埋紅白機、超任我玩,所以,其實我都希望,打機可以搵到食。

 

Comments

comments

Leave a Reply

Your email address will not be published. Required fields are marked *

*

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>