PS Vita, PS3, 主頁, 人物專訪, 專題熱話, 遊戲新聞 — 25/11/2012 at 8:09 pm

有片即睇 鄭伊健遊戲大使訪問 末日前打多啲機!

by

images (15)images (17)

今年12月21日喺灣仔會展舉行嘅「亞洲遊戲展」,搵咗公認係機迷嘅鄭伊健做大使,千呼萬喚,終於今日(25日) 喺活動現真身,之後仲坐定定接受訪問。八卦嘢唔多講,梗係講番打機啦!伊健話佢由細到大都咁鍾意打機,仲成日會online打FPS射擊game,而且仲會開埋咪同隊友chat,如果你有一晚打機遇到條友把聲好似伊健嘅,不妨大膽講句:「那麼瘋癲過,那麼珍惜過,那麼動地驚天愛戀過。」睇吓有冇人應你機。

今日喺荷里活廣場舉行嘅「亞洲遊戲展2012揭幕禮」,鄭伊健現真身!一早公認係圈中機迷,嚟到第11屆先第一次做大使嘅佢喺現場話:「其實個個都知我鍾意打機,但一路都無人搵我做『亞洲遊戲展』代言人,我每次都想出現o架,可能我之前提過12月21日末日啲嘢,今年遊戲展又係12月21日開始,時間好吻合。」講到末日,佢就話:「世界就可能遲早都會末日,我諗最重要都係做好工作,享受自己嘅興趣,例如打機。」不過佢就話如果末日嘅話,最緊要都係朋友家人喺身邊,如果唔係,帶部機喺身,有機打都冇癮。

唔踢波打羽毛球
好喇,講打機喇。之前佢都話過鍾意玩射擊遊戲,不過,現場《Game Weekly》嘅電玩太郎問得好:「足球遊戲啱唔啱呀?」「足球遊戲我就真係冇玩,我都唔踢波嘅,我打羽毛球o架嘛。」係喎!冇羽毛球game啱你哋玩喎!嘻!咁會唔會同女朋友齊齊打機呢?「我同佢打嘅遊戲唔太似,我就打打殺殺,佢就偏向玩啲簡單啲,儲嘢嗰啲。」

images (14)images (18)

 

 

手提機頂到癮
近排打咩機呢?「近排都打好多喎,當中我諗主要係打《Call of Duty》,不過o依家多數打手提機,喺屋企開機打就唔多,有時唔方便開機又唔會打到好長時間……所以大機版(主機版)都未開,都係打細機版(PS Vita版),一拎出嚟就可以打,都止到吓癮!」大家出咗嚟做嘢嘅機迷有冇發現,問親朋友呢排有冇打機,都係話o依家冇喇,邊有時間吖,係咪人越大打機嘅時間就越少呢?「唔關事嘅,我覺得睇時間分配啫,即係好似其他興趣,又好似做運動咁,幾忙都會抽到時間打。我又唔係打好多,不過成日都會想買新game返嚟睇吓玩吓,欣賞吓啲製作人嘅
心思。有時都會諗,點解佢哋咁犀利,咁都諗得到?」

images (16)

長期熱衷打機
講到機迷身份,伊健話其實圈內好多人都鍾意打機而且打得好勁:「係因為我唔掩飾啫,所以大家都覺得我最鍾意打。」你同我都係讀書時間打機最瘋狂,伊健話佢自己就keep住都好熱衷:「其實每個時期都有瘋狂嘅時間,好似以前玩啲舊機,又有段時間玩『智慧星』(我google唔到,有冇人可以話到俾我知咩係智慧星?),o依家我都好熱衷打機。」至於有咩game期待,「聖誕檔期嗰啲都開始出得差唔多,期待……頭先試玩嗰隻(《Soul Sacrifice》)都幾好,o依家啲遊戲都係偏向呢類,不過連線希望方便啲,最好可以一開機就連到。」

 

懷念去『龍珠商場』買GAME的年代
莫講話伊健,年過30歲嘅機迷好似我咁都好鍾意講情懷。講到以前同o依家嘅遊戲界有咩唔同,佢話:「我鍾意以前嗰種感覺多啲。以前會好投入,嘩,睇書見到會出呢隻遊戲喎!有畫面睇喎!好期待佢幾時出,好想即刻去買。」o依家可以安坐家中下載最新遊戲嘛?「係,以前我會去『龍珠商場』買game,不過我儲得好少,因為我鍾意玩完之後就俾其他未玩過嘅人玩,多啲人分享一隻遊戲嘛!」o依家打機,同以前唔同嘅,仲有連線玩法,「係呀,我都越嚟越多online打機。我都會同人chat,冇嘅,大家都掛住殺人,邊有人理你係邊個吖。」即係,你隨時
同伊健交過手呀!

最後,有冇邊個遊戲角色想做?「遊戲拍做電影,好難揀喎,同埋都好難做,其實o依家個遊戲界,同電影都好密切,以前就話電影未做到嘅虛擬世界,遊戲可以做到,但o依家唔同晒喇。」

嘩!我咁懶,今次訪問都打咗咁長,你哋就知伊健有幾nice,問佢打機嘢咩都答,而且冇話趕住走影多幾張相都好歡迎,呢啲咪巨星風範囉!抵我哋編輯尉遲一由陽光檸檬茶到陳浩南到聶風到我老婆唔夠秤再到我老婆唔生性都依然咁崇拜佢,呢個訪問都係為免佢過份緊張以至手心冒汗而hang機變鵪鶉,所以先由我做咋!

 

Comments

comments

Leave a Reply

Your email address will not be published. Required fields are marked *

*

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>