主頁, 人物專訪, 專題熱話 — 31/05/2012 at 11:58 pm

「我喺廁所諗出嚟嘅!」《Lollipop Chainsaw》製作人須田剛一專訪

by

如果你係硬派正直遊戲迷,如果你對靚女目不轉睛只在乎遊戲性,咁就啱喇,我都係!所以你千祈唔好睇啲咩Jessica C.扮《Lollipop Chainsaw》女主角嘅報導,更加唔好理人哋外國嗰位Jessica Nigri同日本個川本真由,一於睇吓遊戲製作人須田剛一嘅專訪啦,「學園恐佈加學園偶像嘅喪屍遊戲,呢個概念梗係我喺廁所諗出嚟o架啦!」大家男人,啱傾啲嘛!

 

遊戲6月14日推出,GameoverHK透過SCEH安排同《Lollipop Chainsaw》製作人須田剛一做咗一個專訪。先嚟都係大路嘢,須田先生話佢喺遊戲嘅世界觀上,被80年代嘅音樂影響好大,因為當年嘅音樂聽一次就有深刻印象:「所以我用佢哋嘅節奏同氣氛作參考。」至於同其他喪屍遊戲相比……「到此為止,我哋都未見過一款可以見到紅色比心飄散,斬殺喪屍時又有彩虹圖案出現的喪屍遊戲,請一邊食爆谷一邊玩吧!」冇錯喇,呢個遊戲最吸引之處就係呢度,須田先生好快已經講出遊戲賣點,不過,仲有一大賣點,就係遊戲採用雙聲優設定為女主角配音,須田先生就話呢個唔係佢諗:「呢個係角川先生嘅想法。」

如果本身唔係喪屍迷,好難做到一隻遊戲滿足到班屍迷,你睇高登咁多屍故又有喪屍片嘅深入討論就知,喺喪屍範疇,大家都係行家。作為專家,須田先生話佢受好多作品影響,齋講電影都有:《Night of the Living Dead》、《ZOMBIE》、《The Evil Dead》、《Return of the Living Dead》、《Fido》、《Wild Zero》、《Zombie Strippers》等等,你唔知咩嚟?唔緊要,《活死人凶間 Dawn of the Dead》、《活跳屍 Re-Animator》、《喪屍出籠 Day of the Dead》聽過啦,佢都有睇,仲有,連《笑死人兇間 Shaun of the Dead》呢套好嘢佢都有列出嚟!「至於遊戲中San Romero High School發生喪屍恐慌嘅設定,靈感就係嚟自Ramones電影《Rock And Roll High School》。」焦點所在,離唔開可愛女主角朱麗葉,原來設計呢個女主角時,須田先生嘅假想敵竟然係同可愛完全扯唔埋嘅羅拉!「係,只係想創作一個可以超過Lara Croft嘅新世代女主角。」

至於鍾意玩嘅遊戲,唔係喪屍唔係動作,竟然係賽車,但亦都唔係你哋諗緊熱門嗰幾隻,「到o依家為止,我最鍾意嘅遊戲都冇變過,就係《Burnout Paradise》。」玩過呢隻瘋狂賽車遊戲嘅話,應該可以期待《Lollipop Chainsaw》會有幾橫衝直撞!最後,須田先生話暫時未有諗過會出新DLC,不過就會有World Ranking Mode、Score Attack、Time Attack、Medal Attack等玩法。好有良心。

Comments

comments

Comments are closed.