Post Tagged with: "《古惑仔》"

寫個服字俾牛佬!峰迴路轉佐維唔使死!
by / on 14/12/2017 at 7:29 pm

寫個服字俾牛佬!峰迴路轉佐維唔使死!

Fake晒!真係俾牛佬玩死,又二呎四度頸對峙,又疑似中流彈,又甚麼「後腦附近拖出一條血水,頭部似是無力的往左方一側」,原來統統都係為製造高潮而設,今期第2087期《古惑仔》揭盅嘞,結果係因為「好彩」子彈射唔中,佐維呢個「永遠第一」今鋪唔使死。相信呢兩三個禮拜,一眾讀者包括我個個都心如鉛墜兼鬼殺咁嘈,全拜如此有壓迫感劇情所賜,計落牛佬係好嘢嘅,抵讚。這邊廂執番身彩,那邊廂趙繼邦睇個勢都係要死,我估計係死喺丁瑤呢個老虔婆手上,不過就由金尊貴落手,唔知有無估錯呢? 相關資訊牛佬設定《古惑仔》女角多白髮? 佐維+立花擸木刀劈友? (Sep 27, 2017) 《古惑仔》新專欄 連載小說《飛女正傳》登場 (Aug 29, 2017)

Read more ›

支持牛佬決定!佐維同趙繼邦攬住上路!
by / on 08/12/2017 at 3:04 pm

支持牛佬決定!佐維同趙繼邦攬住上路!

無喇,呢次真係無交嗌喇,牛佬喺今期第2085期《古惑仔》出埋下期預告圖,佐維同趙繼邦一齊攤屍成地血,仲定埋下期書名叫〈一起「上路」〉,佐維真係要向閻羅王報到喇。今期雖然唔算打得好燦爛,但都算好精采,係有少少估唔到映姐一個斧頭劈中天靈蓋就收皮,之前唔係有伏線略略講過佢打算投靠洪興嘅咩,點解咁快整死佢?另外,斷估我諗有好多讀者都同我一樣,唔捨得佐維死,但一本公仔書無理由唔死重要角色嘅,所以縱依依不捨,我都係支持牛佬決定嘅,還望下期佐維死得轟烈啲、有型啲Or有情懷啲,兼可以的話,留立花正仁一條生路喇,我好驚連立花都打柴呀……驚驚! 相關資訊受颱風「天鴿」影響 《古惑仔》延遲至周五出版 (Aug 24, 2017) 牛佬!《古惑仔》大格咗啲喎!韓賓一味耷低頭捱揪! (Aug 18, 2017)

Read more ›
《古惑仔》搞Gag 牛佬想整死佐維同立花?
by / on 27/11/2017 at 9:45 pm

《古惑仔》搞Gag 牛佬想整死佐維同立花?

牛佬喺今期第2082期《古惑仔》搞Gag,今次唔係畫Q版,而係用一格畫讀者,透過讀者把口話:「呀,呢個天川秀,居然係佐維嘅徒弟?」係OK好笑嘅,不過呢,天川秀同佐維係師徒關係,我諗好多讀者都同我同一樣,上期已經係咁估喇。另,睇到「牛佬的話」,我有啲驚,事關牛佬咁寫:「……佐維And立花正仁呢兩大神人,今勻真係紮紮地嘞!」猶記得早十期八期兩大神人交心對話,大家都好欣賞對方兼視對方為知心友云云……如此這般,好似有晒伏線咁嘅?牛佬,你唔係真係想整死兩大神人呀? 相關資訊牛佬《Bloody Girl》網絡劇開播 呂英紅年紀大咗少少 (Jul 24, 2017) 書展撐牛佬!撐《赤軀隨遇》! (Jul 20, 2017)

Read more ›
《古惑仔》出錯? 同一期出兩回〈飛女正傳〉?
by / on 20/11/2017 at 4:36 pm

《古惑仔》出錯? 同一期出兩回〈飛女正傳〉?

一打開今期第2080期《古惑仔》,慣性地先睇連載小說〈飛女正傳〉,故事講到第23回,咦?乜內容咁熟口熟面嘅,樂兒喺天台俾人輪大米吖嘛,好似上星期講過咯喎。之後揭到尾,謎底解開嘞,原來同期出現埋第24回,我仲以為自己咁無記性添。點解同一期會出現兩篇〈飛女正傳〉呢?我估牛佬搞錯咗落錯稿啩?而開頭嘅第23回,原本係諗住登啲乜嘅呢?忽然好想知…… 相關資訊向《古惑仔》電影致敬? 冷氣機廣告惡搞南哥/細細粒/烏鴉 (Jun 29, 2017) 《同擔日月天》變K歌 Bar Pacific + Bar East有得唱 (Jun 28, 2017)

Read more ›
瑞新《火武耀揚》豪華珍藏版 11月22日見街
by / on 08/11/2017 at 10:18 pm

瑞新《火武耀揚》豪華珍藏版 11月22日見街

終於出咗正式廣告嘞,喺今期第942期《火武耀揚》,邱瑞新寫明《火武耀揚》豪華珍藏版將於11月22日見街。全書144頁,燙金書套式封面,粉紙過膠精印,有埋昔日封面重溫咁話喎,每本$48。不過奇怪在,瑞新寫明成輯故事只得九冊,喂?唔打算由頭出到尾咩?出九冊咁少,個故事會去到邊停?其實最好就好似《古惑仔》咁重新出一次喇,硬生生Cut,儲書會儲得好無癮喎。 相關資訊別矣《火武耀揚》飛龍!一路好走! (Dec 13, 2017) 《火武耀揚》震撼一期 跪求瑞新唔好整死飛龍 (Dec 6, 2017)

Read more ›
別矣《古惑仔》Tommy! 促請牛佬交代死因!
by / on 30/10/2017 at 8:45 pm

別矣《古惑仔》Tommy! 促請牛佬交代死因!

無記錯的話,應該前後不過四期貨仔,我們的暗黑之門殺手Tommy,喺今期第2074期《古惑仔》亦步紅魔女後塵陣亡,同樣係死無全屍,仲俾佐維用刀拮住個頭揈揈吓添,好慘呀,之後個死人頭仲要俾鬼子快刀當菠蘿咁削開三四截,好無陰功呀。拿,牛佬,我在此替廣大讀者跪求,話晒係有頭有臉嘅殺手,懇請畫番十頁八頁,交代番Tommy點樣俾佐維KO,否則,我們的Tommy Lin會唔開心架,嗚嗚~ 相關資訊《古惑仔》派膠 佐敦有燈唔射射燈掣 (May 10, 2017) 喂牛佬!《古惑仔》印歪咗喎! (Apr 24, 2017)

Read more ›

《古惑仔》紅魔女陣亡! Tommy離死不遠?
by / on 24/10/2017 at 9:00 am

《古惑仔》紅魔女陣亡! Tommy離死不遠?

哎吔!乜咁快整死暗黑之門排名第三嘅紅魔女呀,或者因為露紅Bra關係,我幾鍾意呢個角色,估唔到三兩期貨仔就陣亡,喺今期第2072期俾自己把腰刀攔腰劏開兩截,心底裡有少少唔捨得;不過呢種死法都幾有新鮮感,睇得出牛佬有真正落過心機,係要讚嘅。另,紅魔女既死,我估實力再次一皮嘅Tommy都離死不遠,唔知面書朋友仔Tommy Lin睇完今期,會唔會有啲擔心呢?都係嗰句,牛佬,跪求唔好咁快整死Tommy Lin喇。 相關資訊《古惑仔》哀傷一期!別矣世飛!別矣趙縈! (Feb 16, 2017) 賀《古惑仔》2000期送海報 悲徐世飛之死 (Feb 14, 2017)

Read more ›
《古惑仔》寫錯出版日期 紅魔鬼殺著係紅Bra?
by / on 21/10/2017 at 6:08 pm

《古惑仔》寫錯出版日期 紅魔鬼殺著係紅Bra?

  今期第2071期《古惑仔》好睇,劇情係有啲驚喜嘅,以為兩個郭過係Twins,原來係師徒關係,暗黑之門排名第三嘅紅魔女亦正式出場,擸住兩把餐刀嘅佢打開心口露紅色Bra,唔通就係殺著?紅魔鬼個朵就係因為戴紅Bra?另,今期下期預告一頁,竟然寫住「10月23日(星期四)準時出版」!喂,牛佬!又植錯字喇,10月23日係禮拜一呀!小心小心! 相關資訊《古惑仔》復刊珍藏版Boxset烏鴉篇 畀多$10有靚靚硬盒 (Feb 11, 2017) 牛佬賀《古惑仔》2000期送Tee+親筆畫 街市勇吹雞打老邊 (Feb 3, 2017)

Read more ›
《古惑仔》女殺手似教師 兩大神人仲未見到趙繼邦
by / on 12/10/2017 at 8:45 pm

《古惑仔》女殺手似教師 兩大神人仲未見到趙繼邦

親愛的牛佬,唔好嬲嬲豬呀,睇完今期第2069期《古惑仔》,我真係有少少嘢想講,其實呢……究竟呢……佐維同立花正仁仲要打幾耐先殺到入大廳呢?粗略計都好似四五期咯喎,兩大神人都仲未見到趙繼邦,又何來行刺呢?會唔會耐咗啲呢?劇情推進係慢咗少少,不過好彩,有由讀者變身而成嘅暗黑之門第六名殺手Tommy Lin未死,彈吓彈吓間吓場,用有毒餐刀做武器呢個鋪排亦唔錯,而今期最尾一頁出嘅女殺手,未知名,但面相非常教師Look,好鬼萌吓,造型幾討好,總算有啲驚喜。 相關資訊今期必買 《香港電影金像獎特刊》+《我們都是這樣看港漫長大的》 (Apr 11, 2017) 《古惑仔》賀年海報點解釘埋一齊?《同擔日月天》又關甘尚武事? (Jan 26, 2017)

Read more ›
《古惑仔》暗黑之門殺手登場 跪求牛佬咪咁快整死Tommy Lin
by / on 10/10/2017 at 5:10 pm

《古惑仔》暗黑之門殺手登場 跪求牛佬咪咁快整死Tommy Lin

周一買《古惑仔》嗰陣,我已經覺得封面戙企喺佐維後面個角色,有啲熟口熟面,一時間又諗唔起邊個,返屋企瀏覽面書,醒起嘞,原來係面書朋友仔Tommy Lin。呵呵,讀者喺《古惑仔》裡面出場唔係奇事,但喺牛佬安排下,多數係得個名同做啲大佬輩嘅得力門生,鮮有如Tommy Lin般咁吃重戲份兼依足佢本尊個樣嚟畫。喂,暗黑之門喎,殺手喎,擸把短刀就可以同神人級數嘅佐維鬥喎,都咪話唔勁。我諗Tommy Lin應該會好開心,而為咗延續呢份開心,我代其他《古惑仔》死忠Fans跪求牛佬──可唔可以唔好咁快整死Tommy呀?俾佢玩多陣喇。由此可見,牛佬同讀者嘅互動,係做得好好嘅,抵讚。 相關資訊估佢唔到倫裕國 唱《同擔日月天》有Feel (Jan 14, 2017) 《古惑仔》搵俱樂部會長 牛佬擺街市勇上檯 (Jan 4, 2017)

Read more ›
《古惑仔》送手機貼紙 鷹靚定龍靚?
by / on 07/10/2017 at 9:00 am

《古惑仔》送手機貼紙 鷹靚定龍靚?

今期第2067期《古惑仔》送手機貼紙,分大飛同陳浩南兩款,唔知大家收唔收貨?我買書嗰陣揀咗大飛,貪隻鷹型仔啲、線條顯眼啲,但睇完牛佬喺面書登嘅手機貼紙示範相後,我有丁點兒後悔嘞。一比,原來龍真係靚過鷹喎,無論構圖同顏色都搶眼好多,或者同手機殼本身顏色有關係喇,搞到我家陣心郁郁,想畀多廿蚊牛佬使,買埋陳浩南手機貼紙。 相關資訊網圖分享:白冰的Q版港漫角色 (Oct 12, 2017) 網圖分享:白冰筆下的《山海逆戰》于若蘭 (Jan 25, 2017)

Read more ›

《古惑仔》送車寶山海報 不作完人便為禽獸
by / on 29/09/2017 at 9:00 pm

《古惑仔》送車寶山海報 不作完人便為禽獸

雖則海報只不過係小小Bonus,但我等鍾意儲海報嘅港漫死忠係多多都受嘅。今期第2065期《古惑仔》又送海報,主角係車寶山。唔知有無記錯,印象中牛佬好似好少出車仔海報,我好記得佢嘅人生座右銘──「不作完人,便為禽獸」,依家睇番都仲係覺得好型。 相關資訊終於買得起!3D聶風火麒麟海報$200! (Oct 24, 2017) 余兒推出海報每張$100 《今晚打喪屍》作品展限定 (Oct 11, 2017)

Read more ›
《古惑仔》送神之殺手海報 佐維著老西好斯文
by / on 22/09/2017 at 8:00 am

《古惑仔》送神之殺手海報 佐維著老西好斯文

繼「武神太子」同「地中海」之後,今期第2063期《古惑仔》又送《立花正仁And佐維》海報,多謝牛佬!海報底頁係古惑仔俱樂部網聚相片圖輯,望相發覺都幾人才鼎盛吓,場面好熱鬧,下次再有機會,睇怕我都要參加。至於主角咯喎,立花正仁就畫得一貫地靚仔;至於佐維咯喂,造型好有新鮮感,佢不嬲著開運動衫任由一隻衫袖飄飄吓架嘛,印象中未見過佢著老西打呔,依家登時斯文咗唔少! 相關資訊日本Coser玩《動物朋友》 影「Beast and the Beast」海報太有型 (Oct 6, 2017) 【有計】日本網民分享生活智慧 牆貼萬字夾攝住海報 (Oct 1, 2017)

Read more ›
《古惑仔》送武神太子海報 有埋洪興+三聯權力排行榜好抵睇
by / on 08/09/2017 at 9:00 am

《古惑仔》送武神太子海報 有埋洪興+三聯權力排行榜好抵睇

三個開心,今期第2059期《古惑仔》送武神太子海報,製作精美就梗,難得背頁有埋洪興同三聯權力排行榜,榜裡面有好多新名字,睇個勢遲啲應該有好多新角色出場,咁先似番早期《古惑仔》描寫嘅大江湖嘛,此乃第一個開心;映姐同丁瑤結義金蘭一段文戲,畫得好密格,對白處理同分鏡亦精彩,埋尾趙繼邦仲出動埋久違了的Q版畫法添,真係好耐未見過咯,此乃第二個開心;第三個開心係,專欄強化咗,多咗海報同連載小說《飛女正傳》,成本公仔書即時紮實襟睇咗,我足足睇咗四個地鐵站先睇完,幾耐未試過呀大佬,抵讚呀牛佬。 相關資訊零違和!太子地鐵站菲利塗鴉!原來係江記P圖! (Nov 1, 2017) 港漫x電影《悟空傳》 林祥焜創作漫畫版電影海報 (Aug 9, 2017)

Read more ›
《古惑仔》下期「隨時」送海報 係咪植錯字?
by / on 04/09/2017 at 7:15 pm

《古惑仔》下期「隨時」送海報 係咪植錯字?

睇完今期第2058期《古惑仔》,可以估計趙繼邦不出三期會魂歸天國,佐維加立花正仁出手,實無走雞。而牛佬喺今期賣定廣告,話下期將會送武神太子海報,鍾意儲海報包括我者應該會好Like,不過佢嫰人家居然寫咗「下期隨時附送」,隨時?即係唔知幾時?哈哈,估計係想寫「下期隨書附送」?應該係植錯字嘞。 相關資訊《迷離世界》印得唔好 上官小威送海報致歉抵讚 (Jul 30, 2017) 【相集】日本「秋田犬」介紹「秋田縣」 超高質宣傳海報 (Apr 30, 2017)

Read more ›