Post Tagged with: "《古惑仔》"

《古惑仔》巨星之戰第二場 李成克打唔贏梁家仁?
by / on 10/06/2018 at 1:30 am

《古惑仔》巨星之戰第二場 李成克打唔贏梁家仁?

俾今期第2137期《古惑仔》封面Fake一Fake,書名叫〈前路難行〉,黑白Tone,構圖係李成克耷晒頭咁,仲以為呢個脫北者打輸咗添。睇完內文,李成克未輸,但感覺武值低咗好多,好似得鋪牛力咁,而梁家仁就醒咗好多,有智慧有耐力識得忍。勝負下周一揭盅,純個人預測,呢場應該雙雙墮海,打成平手Super!萬望牛佬唔好為咗煲起第二代,夾硬要李成克輸or慘輸,話晒喺武值排行榜,李成克有6星,梁家仁得4星半,太過夾硬嚟,著實講唔通。 相關資訊《古惑仔》送海報 推新故事「誰是游子健」 (Dec 22, 2017) 寫個服字俾牛佬!峰迴路轉佐維唔使死! (Dec 14, 2017)

Read more ›

悼!《古惑仔》牛姑之死!
by / on 04/06/2018 at 6:09 pm

悼!《古惑仔》牛姑之死!

忙到甩轆,今日係周一,我先有時間睇番上周四出版嘅第2135期《古惑仔》,睇完悲悲戚戚。牛姑,細細粒拜門大佬,一拳,就因陳浩南扯盡吃力之力嘅一拳,呢個橫跨二千幾期嘅角色就咁死咗,一心尋死嘅佢埋尾選擇跣佐敦一鑊,為三聯先輸一仗,求仁得仁。其實有無必要整死佢呢?牛佬想為「巨星之戰」掀起高潮,死啲重要角色無可厚非,但硬係覺得牛姑死得有啲兒戲咗。而更心驚嘅係,仲有幾多主要角色會喺未來十期八期消失?梁家仁?迪文?佐維?唔想左右牛佬度橋,但我真係越諗越驚…… 相關資訊牛佬《金蒙空》唔出實體書 科月費$65有得睇 (May 23, 2018) 支持牛佬決定!佐維同趙繼邦攬住上路! (Dec 8, 2017)

Read more ›
《古惑仔》巨星之戰競猜遊戲 估洪興同三聯五比五平手收場
by / on 21/05/2018 at 10:30 pm

《古惑仔》巨星之戰競猜遊戲 估洪興同三聯五比五平手收場

《古惑仔》三聯對洪興嘅巨星之戰正式開打,男一陳浩南戰牛姑,一開波牛姑就處於劣勢。為煲大呢壇大戰,牛佬搞咗個「巨星之戰競猜遊戲」,邊個估中十場對戰勝出者,即送「得奬者本人與陳浩南一起的彩畫一張」,獨一無二親筆畫,正呀喂,截止日期5月27日午夜12時正。我呢,就咁估,頭場陳浩南險勝、第二場李成克慘勝、第三場何小海勝迪文死、第四場甘尚武大勝、第五場北正恩使詐勝、第六場加藤二勝小馬死、第七場郭秀青勝、第八場立花正仁勝天川秀死、第九場佐維極速勝、第十場大梵完勝亞披勒死,結果係五比五打成平手,廃後輪到金尊貴出場執死雞,唔知估唔估得中呢? 相關資訊三聯書店x曹志豪《死角》 即場繪畫分享會 (Jan 25, 2018) 《古惑仔》搞Gag 牛佬想整死佐維同立花? (Nov 27, 2017)

Read more ›
《古惑仔》新專欄「百戰話當年」 當海報儲
by / on 07/05/2018 at 8:59 pm

《古惑仔》新專欄「百戰話當年」 當海報儲

今期2128期《古惑仔》有新專欄「百戰話當年」,主要重溫重要角色嘅重要戰役,第一話係「立花正仁大逃亡」,構圖並唔係用舊畫拼拼砌砌撈埋一碟就算,係重新畫過,質素直達海報級數,安排喺書中間做跨頁,擺明係方便大家可以搣低落嚟收藏嗰隻。 相關資訊Marvel Studios十週年 33角色海報晒冷 (Jun 11, 2018) 動漫基地換新裝 換邱福龍Q版海報返屋企 (Jun 5, 2018)

Read more ›
牛佬搞Gag有啖笑 金正恩+馬雲突入《古惑仔》
by / on 24/04/2018 at 9:45 pm

牛佬搞Gag有啖笑 金正恩+馬雲突入《古惑仔》

好耐未試過睇公仔書睇到笑出聲,今期第2124期《古惑仔》非常正斗,估唔到牛佬可以搞笑成咁。話說三聯舉行選拔賽以應付「巨星之戰」,埋尾居然出現一眼就睇得出……都唔使「疑似」……係直頭係金正恩同馬雲嘅兩個新角色,名就係咁意改過吓,馬雲改名云「馬騰」,金正恩改名云「北正恩」,而負責考馬騰嘅察拉仲有句超抵死對白:「聽聞宇宙最強的甄子丹和洪金寶也不是你的對手……」為此,網民反應都好兩極,有人覺得如此忽然搞笑,會搞到壇巨星之戰無厘正經不倫不類,緊張氣氛消磨殆盡;有人卻認為出吓呢類騎呢角色,誠然多個話題,反而令故事更聚焦。我呢,都覺得牛佬此著OK,有啖笑固然開心,有新角色加入更加係好事嘛,話唔定呢兩兜友之後有好大發揮呢。猶記得初初地中海出場,都係樣樣衰衰賤賤格格鹹鹹濕濕,毫無高手風範可言,而事實證明呢個角色好成功。 相關資訊李志清贈封面題字四揀一 馬雲呼籲投票幫幫眼 (Jun 15, 2018) 馬雲《黃飛鴻大鬧丁家莊》重新出版 馬少飛畫新插圖 (Jun 7, 2018)

Read more ›
《古惑仔》標錯名 迪文/世傑調亂咗
by / on 20/04/2018 at 9:34 pm

《古惑仔》標錯名 迪文/世傑調亂咗

今期第2123期《古惑仔》出錯,仲要錯喺第一頁版頭第一格,陳浩南昔日保鑣迪文同世傑兩個唔對名,調亂咗,畫嘅係迪文,名就標咗世傑;畫嘅係世傑,名就標咗迪文。牛佬記得過執番好佢,他朝出合訂本唔好出錯。另,劇情講到陳浩南思良將,搵迪文打「巨星之戰」,今期三分一篇幅都描寫迪文有幾好打,越係好打就越……唔知點解我覺得牛佬會整死迪文,而柏美娜,會嬲南哥一世。 相關資訊《古惑仔》出錯? 同一期出兩回〈飛女正傳〉? (Nov 20, 2017) 瑞新《火武耀揚》豪華珍藏版 11月22日見街 (Nov 8, 2017)

Read more ›

《古惑仔》牛姑唔追究李建興 點解嘅?
by / on 30/03/2018 at 5:00 pm

《古惑仔》牛姑唔追究李建興 點解嘅?

睇完今期第2117期《古惑仔》,我眉頭有啲皺,劇情發展唔多對勁喎。上期先話牛姑親口講:「我想死。」今期就話牛姑答應佐敦代表三聯出戰「巨星之戰」,咁都算,但之前李建興挾持潘少枝對付洪興,搞到牛姑無端端同李志高打咗一鑊,事後陳浩南都講到明邊個從中搞鬼,牛姑咁就算數?咁都仲肯同佐敦賣命?牛佬試圖透過旁白說明「但最終因潘少枝認為──那是正確的。是以沒有向李建興追究」解畫,但著實牽強咗啲,唔係好合情理。我有個大膽假設,會唔會牛姑喺巨星之戰專登放水,打輸畀洪興跣番佐敦一鑊兼順便尋死?希望估錯啦。 相關資訊Fools Paradise出佐敦人偶 有埋牛角好有型 (Jun 8, 2018) 別矣《古惑仔》Tommy! 促請牛佬交代死因! (Oct 30, 2017)

Read more ›
《古惑仔》送潮爆貼紙 No輝唔係斷咗手咩?
by / on 02/03/2018 at 8:00 am

《古惑仔》送潮爆貼紙 No輝唔係斷咗手咩?

今期第2109期《古惑仔》繼續送潮爆貼紙,構圖係陳浩南坐梳化煲煙,後面有大大個寫住「義」字嘅匾額,整體構圖係型嘅,要讚係咁細張貼紙,南哥五官都可以畫得咁清楚,製作一啲都唔馬虎。另,睇完今期,除擔心洪興楊思樂會唔會俾察拉搞正外,我仲有個疑問,雖然唔記得斷咗邊隻手同因邊鑊大戰搞到斷手,但三聯No輝唔係斷咗隻手嘅咩?今期講佢同佐敦、九尾狐同藍鯨打牌,一格畫左手揸住一對碰唔出嘅二筒,另一格見右手完整無缺,唔通我記錯?定之後有交代過佢駁番隻手我唔記得咗?記錯勿插! 相關資訊復刻《龍虎門》貼紙 石黑龍原來有英文名 (Apr 28, 2018) 日本拒絕上門銷售怪招 貼亂碼貼紙好有效 (Apr 18, 2018)

Read more ›
《古惑仔》送潮爆貼紙 賀伊文華唔使死
by / on 26/02/2018 at 4:41 pm

《古惑仔》送潮爆貼紙 賀伊文華唔使死

今期第2108期《古惑仔》封面,我覺得好型,南哥啖煙兼眼睥睥嘅表情,韓賓耷晒頭嘅肢體動作,好表達到韓賓呢個洪興龍頭對南哥「功高震主」嘅憂慮,內文韓賓同佐敦通話嘅幾段對白,亦非常精彩,睇嚟三聯離間計開始得逞。今期送「古惑仔父子」潮爆貼紙,我買嘅係雷霆同雷耀揚版,好Like;而更加Like嘅係,雖然俾小海打到仆街裂胸骨,但伊文華只需瞓床唔使死,算不幸中之大大大大大幸咯,我幾驚新年流流又死多件二代呀。 相關資訊《古惑仔》紅魔女陣亡! Tommy離死不遠? (Oct 24, 2017) 《古惑仔》寫錯出版日期 紅魔鬼殺著係紅Bra? (Oct 21, 2017)

Read more ›
《古惑仔》送超靚素描年曆卡 伊文華過唔到狗年?
by / on 15/02/2018 at 7:50 pm

《古惑仔》送超靚素描年曆卡 伊文華過唔到狗年?

今期第2015及2016期孖寶號《古惑仔》送素描賀年卡,一如上期有陳浩南版同大飛版兩款選擇,又一如早幾日咁樓下報紙檔只得大飛版賣,奇怪。張大飛賀年卡真係畫得好靚,倫裕國手畫真係無得頂,不得不寫個服字!今期孖寶號,一次過睇兩期,感覺一氣呵成好多,尤其采妮趕南哥出門口又跪南哥嗰幾格,究竟求南哥啲乜呢?係咪已經Sure咗豹子健已經係游子健?之後又整多格南哥疑似功高蓋主唔放洪興龍頭韓賓在眼內,啲衝突位開始慢慢浮出嚟嘞,估計呢Part故事應該幾正!不過我驚嘅係,為咗製造高潮兼煲勁小海武值同頭腦,牛佬好似想整死伊文華咁款喎。唉,最好唔好喇,二代死吓一個死吓又一個,斷估好多讀者都會同我一樣,好傷心架。 相關資訊韓國Starbucks推出狗狗cupcake 兩款味道超可愛 (Feb 21, 2018) 日本踏入狗年 畫師賀圖柴犬最多 (Jan 2, 2018)

Read more ›
《古惑仔》送財神揮春 陳浩南重遇采妮好有Mood
by / on 14/02/2018 at 12:22 am

《古惑仔》送財神揮春 陳浩南重遇采妮好有Mood

講得出做得到,牛佬繼續送禮,今期第2104期《古惑仔》送賀年財神揮春,開心。本身揮春係有兩款嘅,但唔知點解我樓下公仔書檔只見陳浩南版本,上網見有師兄Post咗大飛版本,搞到我想買兩本公仔書撐一撐牛佬都唔得,或者咁啱俾人買晒喇。另,今期封面陳浩南同采妮對望個構圖好有Mood,食啱情人節氛圍,尤其內文「男女感情,就是一件這麼奇妙的事。不管你是甚麼年紀,不管你智慧有多少,不管你是貧窮或富有……只要你一旦在意,而又即將面對時……心裡還是忐忑不安,卜卜亂跳,控制不來,也驅之不散」呢幾段旁白,睇到我都有少少諗番起以前啲Ex,牛佬起字係幾能夠惹起人共鳴嘅。字好,但有少少嘢想插一插,又係老問題,畫到好大格呀,第九頁隻小腿加高跟鞋、第三十一頁嘅陳浩南倒抽一口涼氣,真係大格到過份咗少少喎,希望可以正視吓喇,《古惑仔》死忠Fans敬上。 相關資訊阿塗好創意 年宵出摺紙小攢盒+畫揮春 (Feb 12, 2018) 英雄所見樂瞳 至Goal Club免費派揮春 (Feb 6, 2018)

Read more ›

《古惑仔》送Q版迷你揮春
by / on 08/02/2018 at 6:45 pm

《古惑仔》送Q版迷你揮春

就嚟過年,牛佬好識做,喺今期第2103期《古惑仔》隨書附送Q版迷你揮春兩大張,分別係Q版梁家仁嘅「家宅平安」同Q版李志高嘅「吉星高招」,仲講到明嚟緊幾期會繼續送添。雖屬小小禮物,但都開心嘅,好意頭吖嘛。最重要係,《古惑仔》係唯一初一嗰個禮拜依然會出書嘅港漫,你知喇,成個禮拜無公仔書睇,好籮籮攣架嘛。 相關資訊日本迷你喵星人亂瞓 攝入軟墊隙縫位超可愛 (Jun 12, 2018) 網圖分享:白冰的超萌Q版Super Heros (May 22, 2018)

Read more ›
讀者熱烈討論 《古惑仔》牛姑使唔使死?
by / on 23/01/2018 at 7:45 pm

讀者熱烈討論 《古惑仔》牛姑使唔使死?

今期第2098期《古惑仔》書名真係何其浪漫與悲壯,叫〈我死也為了她!〉,「她」指潘少枝,為佢死嘅係牛姑。故事講到三聯九尾狐同建興擺局,搞到洪興李志高同牛姑無端端打餐死,牛姑寡不敵眾,攬住自己個女人瘋狂捱斬。畫到呢段,網民熱烈討論牛姑使唔使死,我呢,就認為唔會,一,每逄一個重要角色死,牛佬都或多或少會喺自己專欄事先張揚,今次唔覺;二,牛姑應該仲有大把戲可以寫,佢應該係激起三聯同洪興鬥個你死我活嘅催化劑,呢個催化劑暫時好明顯未用盡;三,都未見牛姑嘅「往事回憶」,所以應該未死得住。執筆至此,我反而有個不祥預兆,唔知點解,我覺得李志高反而會打柴,仲要死得好無厘頭嗰隻,希望估錯喇。 相關資訊《古惑仔》女殺手似教師 兩大神人仲未見到趙繼邦 (Oct 12, 2017) 《古惑仔》暗黑之門殺手登場 跪求牛佬咪咁快整死Tommy Lin (Oct 10, 2017)

Read more ›
神奇膠唱《古惑仔》主題曲 《同擔日月天》又唱又Rap
by / on 01/01/2018 at 8:30 pm

神奇膠唱《古惑仔》主題曲 《同擔日月天》又唱又Rap

之前靚仔勾頭王倫裕國咪唱咗首《古惑仔》主題曲《同擔日月天》嘅,今次仲勁拍埋MV,不過就唔係倫裕國主唱,而係由組合神奇膠深深深深深情演繹,中間仲新加咗段Rap添。個MV都OK好睇架,刀光劍影醉生夢死大江湖,有劈友有爭女有血有汗有群揪有單挑,都幾有九十年代《古惑仔》系列電影Feel。《古惑仔》Fans有必要睇,睇完,仲好應該唱番兩嘴添。 相關資訊《古惑仔》送手機貼紙 鷹靚定龍靚? (Oct 7, 2017) 《古惑仔》送車寶山海報 不作完人便為禽獸 (Sep 29, 2017)

Read more ›
《古惑仔》大飛識飛? 由香港仔跑到荔枝角?
by / on 28/12/2017 at 8:30 pm

《古惑仔》大飛識飛? 由香港仔跑到荔枝角?

今期第2901期《古惑仔》,牛佬又派膠喇,故事講到大飛喺香港仔個私煙竇曝光,浩然拒補襲警,之後聯同大飛逃走,咁唔好彩手持架生嘅佢哋貢咗入由三聯睇場嘅酒吧,誤會下又俾三聯紅棍阿揚追打多一次,於是又再次逃走……走呀走,勁嘞,居然走走吓走咗入荔枝角地鐵站。大飛叫大飛啫,唔會真係識飛啩?笑料一單,笑完就算,不過牛佬,下次要多加留意喇。 相關資訊《古惑仔》送神之殺手海報 佐維著老西好斯文 (Sep 22, 2017) 《古惑仔》送武神太子海報 有埋洪興+三聯權力排行榜好抵睇 (Sep 8, 2017)

Read more ›