Post Tagged with: "《新著龍虎門》"

恭喜晒!《新著龍虎門》金神魔君+極樂魔僧死得好!
by / on 16/04/2018 at 9:17 pm

恭喜晒!《新著龍虎門》金神魔君+極樂魔僧死得好!

忙,搞到今日先有時間睇上個禮拜啲公仔書,睇完今期第935期《新著龍虎門》,大有如釋重負之感,噓,好咯,隨住宇一航散功兼爆湧飛昇係騙局,啲乜乜飛仙物物元嬰睇怕都可以告一段落。慘只慘在兩個獵神者金神魔君同極樂魔僧,初初出場係威係勢,家陣一個俾易天行求其一爪爆頭,另一個做磨心俾白仇同易天行轟成肉醬。不過死得絕對好呀,佢兩個唔死,啲甚麼天羅呀地網呀山崩呀海嘯呀都唔知幾時完,舊著《龍虎門》一玩到老祖宗飛昇即失控,真係唔想新著都重蹈覆轍。真心的,希望偉大的編劇可以認真度番啲在地啲橋,唔好再玩長生不老、成仙成佛呢啲睇到人硬嘅劇情,乜硬?拳頭硬呀。 相關資訊《春秋猛士》創刊 畫功中上48頁好抵睇 (Aug 2, 2016) 玉皇朝《春秋猛士》率先跑出 三月正式出版 (Mar 1, 2016)

Read more ›

《新著龍虎門》讀者提出「龍虎十大主將表」 王小鷹做老一?
by / on 12/03/2018 at 10:30 pm

《新著龍虎門》讀者提出「龍虎十大主將表」 王小鷹做老一?

今期第930期《新著龍虎門》「玉郎Mail」,有馬來西亞讀者來信整咗個「龍虎十大主將表」,我就覺得非常唔掂嘞。原因有三:一,既云「十大」但又唔只十人,直頭超過廿人,非常之唔知想點;二,「一帥」係王小鷹,唔係啩?一個行行企企多過打交嘅角色居然做龍虎門當家老一,嬲囉,王風雷同戒仔份屬「二奇」,佢兩個都無理由同Grade,而三皇只可靠邊站,呢個絕對錯晒喇;三,唔齊人,如果言生同龍五等異人館人馬都可以加入龍虎門,咁金牛、金詩詩、普陀法王同王伏虎等人更加唔可能唔Count。想知呢個表係點,入嚟有得睇,大家可以討論吓…… 相關資訊你知道嗎? 王小虎英文名叫Tiger (May 16, 2018) 網圖分享:Wee See Heng的降龍十八腿 (May 8, 2018)

Read more ›
《新著龍虎門》石武夫歸天 鐵心殉夫王小鷹見死不救?
by / on 02/03/2018 at 9:00 am

《新著龍虎門》石武夫歸天 鐵心殉夫王小鷹見死不救?

龍虎群英裡面,我最唔Like王小鷹,幾乎次次打交佢都係最Hea嗰個,話就話想定位佢成為龍虎門智囊或軍師,但一味得個講字唔多通喎,鑊鑊兄弟有難都好似唔關佢事咁。好喇,喺今期第929期《新著龍虎門》裡面,佢過泰國幫石黑龍搵老豆,以為可以做番場好戲喇,點知一樣派膠收場。喂,石武夫疑似俾蚩尤打死咗,算,但鐵心話晒係好兄弟嘅哎吔老母,家陣自焚喎,尋死喎,居然見死不救?不救原因又居然係「鐵心一心殉夫,阻不了她下一次」,真係有無搞錯呀?阻不了下一次都阻咗呢一次先喇。上期南宮戒不忍對所謂嘅至尊會高手趕盡殺絕,搞到幾乎命喪白仇劍下,對敵人尚且如此仁慈,對鐵心呢個自己人卻任由佢自殺?龍虎門精神去咗邊?真係十萬個為甚麼。 相關資訊《新著龍虎門》聯乘XM Studios 火雲邪神Figure未知價 (Jan 25, 2016) 《新著龍虎門》聯乘XM Studios 老祖宗Figure盛惠$6090 (Jan 22, 2016)

Read more ›
《新著龍虎門》重用三招了舊橋 老妖「神經病」忽然說教?
by / on 26/01/2018 at 7:45 pm

《新著龍虎門》重用三招了舊橋 老妖「神經病」忽然說教?

今期第924期《新著龍虎門》,我睇到笑出聲。話說老妖惡鬥甚麼鷹爪門主,兵凶戰危間,老妖竟然話:「我有話說,雖然應該是白說的!我老妖是過來人,為錢為非作歹,沒好下場!」卻換來對手一句:「神經病!」梗係神經病啦大佬,劈緊友呀依家,打到一身血先嚟無端端說教,這是甚麼神邏輯?唔知仲以為佢係社工。另外,韋陀戰燕長空一戰,玩各打對手三招唔還手,韋陀先打,燕長空憑玄氣經捱得過,到燕長空打,韋陀憑九霄真經勉強頂得住,點知燕長空食言還拖。其實呢種打法之前舊著都玩過,無記錯的話,應該係蚩尤對龍貫天,一人一招輪流打對手,打打吓龍貫天笠水還拖,最後俾蚩尤一招雷霆擊鼓KO,不過講到嗰種血肉橫飛嘅畫面迫力同針鋒相對嘅對白咯喎,就真係新不如舊咯,舊著睇得人肉緊好多。 相關資訊網圖分享:超萌!栢迪的女版龍虎群英! (Nov 12, 2015) 再推空氣淨化器,剩餘物資賀《新著龍虎門》800期? (Sep 5, 2015)

Read more ›
網圖分享:頭七已過 悼陳傲雲之死
by / on 16/01/2018 at 8:27 pm

網圖分享:頭七已過 悼陳傲雲之死

唔想成日掛喺口邊,但著實係新不如舊,《新著龍虎門》不及舊著《龍虎門》係鐵一般事實。想舊著陳傲雲俾王小虎一招裂頭腳踩死,當真大快人心,當年嘅我都不知睇得幾激動;新著陳傲雲之死呢,則劇力欠奉,死得兒戲兼無厘頭。Anyway,佢始終係一代奸仔,喺唔少港漫迷心目中有一定地位,所以都有人出圖悼念。都過咗頭七,啲悼圖都係得咁少,但總好過死咗丁點迴響都無。陳傲雲,一路好走喇。 相關資訊白蓮聖上突入《山海逆戰》? 跪求唔好整死于若蘭! (Mar 16, 2018) 網圖分享:白冰的Q版港漫角色 (Oct 12, 2017)

Read more ›
《新著龍虎門》陳傲雲真的死了 兒戲兼求其
by / on 11/01/2018 at 8:57 pm

《新著龍虎門》陳傲雲真的死了 兒戲兼求其

喺今期第922期《新著龍虎門》,陳傲雲真的死了,呢次應該係堅死。個人認為,話晒一代歹角,死得實在有啲兒戲同唔合情理。兒戲在係咁意拖三兩期,打兩嘢就俾王小虎一招霹靂狂龍了結,最慘係連死嗰期封面都無得擔當吓,好唔夠劇力,感覺求其。不合情理在一,吸晒武聖一身功力,居然仲好似渣過平時;二,打唔贏,走,陳家無影無蹤身法居然敗在剛剛俾移魂大法糟質完嘅王小虎,真係有無搞錯;三,想當年舊著陳傲雲一招刻骨分肩爪即廢白無涯,家陣王小虎破呢招好似食粒糖咁易,又係講唔通,太過弱化咗陳傲雲喇。Anyway,人多死咗咯,祝呢個一代奸仔一路好走喇。 相關資訊復刻《龍虎門》有缺失 怪碼出唔到個「嫩」字? (Jul 11, 2017) 網圖分享:幪超降龍十八腿 Chan Hon Chung心機之作 (Jun 8, 2017)

Read more ›

《新著龍虎門》事先張揚 陳傲雲真係歸天?
by / on 28/12/2017 at 7:00 pm

《新著龍虎門》事先張揚 陳傲雲真係歸天?

《新書龍虎門》專欄「玉郎周記」通常風花雪月多,好少會劇透,今期920期唔同,事先張揚奸仔陳傲雲下期會死,下期書名直頭叫〈怒殺陳傲雲〉,仲寫明:「……正正是天要陳傲雲滅亡先令他瘋狂了,最重要的是,陳傲雲真的沒戲了,亡在小虎腳下,大快人心」云云。喺舊著佢點死法,家陣我仲歷歷在目,無記錯埋尾陳傲雲呢個天下第四俾老祖宗拋低,臨死想打戒仔主意,點知俾戒仔一招霹靂禪震反KO,都死得好有型吓。新著就上期先玩偷襲小虎,今期二揪一埋龍五,下期就死咁兒戲?得三期貨仔打兩打就死得?講真我唔係好相信,甚麼假死、半生不死、生不如死咋話? 相關資訊大手筆 玉皇朝送盈量級簽名板 (Aug 29, 2015) 玉皇朝旗下漫畫 下期加價至$17 (Aug 25, 2015)

Read more ›
《新著龍虎門》2200期特別版 一書六板$740
by / on 14/12/2017 at 9:30 pm

《新著龍虎門》2200期特別版 一書六板$740

一本公仔書可以出到2200期,確實係一個里程碑,之所以《新著龍虎門》2200期出紀念版,亦屬順理成章。價錢$740,包6幅降龍神腿水晶簽名板第二彈同第2200期漫畫,計死數,減番公仔書本身$20,每幅簽名板均除$120,我就覺得價錢尚算合理。玉皇朝除咗喺今期《新著龍虎門》闢一頁賣廣告外,鄺志德亦都喺私人面書幫手宣傳,仲畀多幅草圖封面畀大家添,我估儲開第一彈嘅,今鋪都應該唔會走雞。 相關資訊香港版《鋼之煉金術師》完全版開訂 $1288送八張明信片 (Nov 28, 2017) 鄺志德慈善義賣珍藏 善款全數捐畀樂施會 (Sep 11, 2017)

Read more ›
《新著龍虎門》出錯出更正 鐵帽子王似唔似金牛座黃金聖衣?
by / on 14/12/2017 at 9:01 pm

《新著龍虎門》出錯出更正 鐵帽子王似唔似金牛座黃金聖衣?

眼利讀者應該睇到上期《新著龍虎門》有兩格出錯,一格講蚩尤打斷白仇條機械臂,旁白寫蚩尤係「獵神者」,失驚無神升咗Grade;另一格係埋尾嗰頁,小虎對住易天行講:「知道!」無頭無尾都唔知知道啲乜,自言自語傻仔咁款。為補鑊,今期第918期出番更正啟示,將「獵神者」改番「勁敵」,而易天行原來係有對白嘅,對白係:「可以開始修復你的經脈了,緊記,對我要絕對信任。」人誰無錯,肯補鑊,有錯就改,應該畀番隻手指公佢。另,今期新出場嘅甚麼鐵帽子王燕山河,一身造型似唔似聖鬥士?加埋顏色橙橙金金咁,仲要頭盔又有角,似唔似金牛座黃金聖衣? 相關資訊打卡時間到!時代廣場一比一黃金聖衣現身! (Aug 9, 2016) 玉皇朝《神掌》 7月24日創刊 (Jul 23, 2015)

Read more ›
《新著龍虎門》「*’b8豆a」係乜? 易天行成功奪舍未?
by / on 09/12/2017 at 6:16 pm

《新著龍虎門》「*’b8豆a」係乜? 易天行成功奪舍未?

人唔係機器,總有錯漏,不過今期第917期《新著龍虎門》專欄「虎躍龍門」就實在好唔小心喇,其中一段咁寫──「……在此先不談白仇的武功了,說說白仇的情感*’b8豆a,天嬌和白仇已成一對了……」何謂「*’b8豆a」?應該係亂碼,又或唔記得轉番倉頡輸入法先打字,搞到又中又英都幾礙眼吓,下次要多加留意咯。另,大大話話都鋪咗十期八期,究竟易天行能唔能究成功奪舍呢?龍五又係咪已經「思想上」死咗呢?但見今期封面小虎大頭左眼非常魔鬼Feel,連武聖都釘埋,仲諗住可以正式入戲肉添,點知又係得收尾三兩頁輕輕帶過,講真……都拖得好耐吓咯喎。 相關資訊有片:迫擊砲爆西瓜 超強殺傷力似爆頭 (May 18, 2016) 復刻《龍虎門》一書三版本 9月25日出版 (Sep 18, 2015)

Read more ›
玉皇朝加價 《新著龍虎門》+《皇朝君臨》下期$20
by / on 29/04/2017 at 9:30 am

玉皇朝加價 《新著龍虎門》+《皇朝君臨》下期$20

黃玉郎喺今期第884期《新著龍虎門》「玉郎信箱」透露:「經詳細分析、慎重考慮後,敲定玉皇朝旗下的《新著龍虎門》及《皇朝君臨》,由下星期開始作溫和調整,象徵式加一元,每本售價二十元正。」都覺得意外架,唔係意外佢加價,而係意外佢居然忍到呢一刻,先同其他港漫睇齊加一個大洋。你問我成壇嘢點睇?繼續睇囉。係,我認我好唔長進,我認我好不滿《新著龍虎門》劇情,唉……蚩尤由戰神變傻仔、石黑龍同王小虎變大茄、王風雷繼續行行企企唔知做乜、出埋晒啲獵神者遲早變《龍珠》、陳傲雲又狗唔搭八出場……但,我實在過唔到無《新著龍虎門》睇嘅禮拜五,呢一蚊,我實豪畀佢。 相關資訊《山海逆戰》一書一立體海報$68 家陣開訂 (May 22, 2018) 復刻《龍虎門》貼紙 石黑龍原來有英文名 (Apr 28, 2018)

Read more ›

孖寶裝《新著龍虎門》1月19日見街 送利是封每本$60
by / on 06/01/2017 at 9:45 am

孖寶裝《新著龍虎門》1月19日見街 送利是封每本$60

每年見到玉皇朝賣利是封廣告,即係代表農曆新年就快到嘞,今年孖寶裝《新著龍虎門》鐵定1月19日出版,特別版分「龍虎三皇戰無不勝」同「神威虎猛天下無雙」兩個專刊版本,各附送一套八個利是封,各售$60。兩套利是封有乜唔同?無唔同,都係龍虎三皇、王風雷、戒仔、石鐵、王小鷹加韋陀做主角,淨係底色一紅一黃有分別咁解啫。抵唔抵買?梗抵!計死數,孖寶裝即係一書兩期內容,《新著龍虎門》依家賣緊$19,兩期內容即係本身已經值$38,$60減$38即係$22,$22除8,即係每個利是封唔使$3,咁你話抵唔抵嘞? 相關資訊丟那星賀年揮春+利是封+貼紙 我真係恭喜你呀! (Jan 24, 2018) 俊?邊度俊呀?睇過…… 「賤人新世紀」利是封笑爆嘴 (Jan 12, 2018)

Read more ›
《新著龍虎門》有話題 極樂魔僧似印度佬?
by / on 26/12/2016 at 9:00 am

《新著龍虎門》有話題 極樂魔僧似印度佬?

今期第866期《新著龍虎門》書名叫〈逆反易筋經〉,封面火雲邪神擔正,點知原來識逆反易筋經嘅係新角色極樂魔僧,吹脹!又逆又反咪即係負負得正?咪即係無變過?想點呢?講完武功再講造型,好多港漫迷都話極樂魔僧勁似《Street Fighter V》印度佬──Patrick Fung話:「真係街霸5個印度佬黎wor!」、遊震疆咁話:「印度神油始創人──極樂魔僧:條也星,反皮易筋經!」、Louis Runner咁話:「個故事已經亂到七彩,又加個神油僧人,絕技Yoga Fire。」、Wai Man Shiu咁話:「印度佬擺明攝期,只是新龍傻編連武功都懶諗,是但加過逆反就是好勁,遲些等我得閑,等我寫一篇《易筋經可以去到幾盡》,同大家分享。」似,我都覺得幾似。講到想像力,我諗要寫個服字畀史史劇場,佢直頭作埋畫諷刺,另加留言曰:「睇到某群張圖,我第一眼已經覺得係合體前奏喇~」而幅圖,擺明寸第29頁介紹逆反易筋經乜關物關嗰幅全版,合體添喎,咁都諗得出,笑咗。 相關資訊網圖分享:白冰筆下的《山海逆戰》于若蘭 (Jan 25, 2017) XM Studios x 火雲邪神Figure開賣!似唔似劉華? (Dec 28, 2016)

Read more ›
「壹壹壹捌」皇者再臨 玉皇朝出新著《天子傳奇》?
by / on 14/10/2016 at 8:30 pm

「壹壹壹捌」皇者再臨 玉皇朝出新著《天子傳奇》?

今期《新著龍虎門》背頁出咗個疑似廣告物體,疑似人設又疑似封面,仲有疑似故事簡介:「為了不讓這裡變成另一個朝歌!我決定要以先天乾坤功,把你轟進冥獄!」玉皇朝出新書就梗架嘞,但究竟係乜東東呢?睇角色相頭有啲似姬發,再加埋「皇者再臨」四隻大字,好難唔令人聯想到係《天子傳奇》系列;而「壹壹壹捌」四隻大字呢,唔通又暗示緊將會喺11月18日出版?BTW,疑似廣告物體一出,鄺志德面書即時好唔得閒,讀者紛紛留言詢問──郭晉瑋:「外表是姬發,其實是演新的角色吧?」、Chan Howard:「新著天子?!」、Cho Kin Joe Ng:「超期待。」究竟即係點啫?As一個港漫迷,我都好想知道答案呀。 相關資訊鄺志德玉皇朝新作 鄺彬強+鍾英偉回歸 (Oct 18, 2016) 玉皇朝出三新書 創號刊序章$10試水溫 (Jan 5, 2016)

Read more ›
《新著龍虎門》一連四期合併封面 水準之作抵讚
by / on 23/08/2016 at 10:15 pm

《新著龍虎門》一連四期合併封面 水準之作抵讚

雖則真係唔知為乜而打,雖則故事真係好混亂,雖則真係好唔Like白仇變天下無敵,雖則好擔心老祖宗跌番落凡間令到本書會變《龍珠》,但《新著龍虎門》一連四期嘅合併封面係確實要讚嘅。三皇加王風雷每人做一期封面主角,水準靚絕,構圖無可挑剔,最過癮係令讀者有所期待,845期見街,大家會知846期同845期可以合併成雙封面,到846期見街,大家又估到847期同前兩期合併做三封面,幾時完?結論係去到848期先完!係有啲玩味嘅,幾千般不願都好,今次,係值得畀番黃玉郎一個Like嘅。 相關資訊《Deadpool 2》外國超正電影宣傳 惡搞知名電影封面 (May 18, 2018) 日本童星「吉川愛」眨吓眼18歲 濕髮造型登雜誌封面 (May 1, 2018)

Read more ›