Post Tagged with: "《火武耀揚》"

《火武耀揚》明寸權貴 佳哥甩鼻血腥美學
by / on 03/05/2018 at 10:15 pm

《火武耀揚》明寸權貴 佳哥甩鼻血腥美學

邱瑞新敢言作風,我一向Buy。今期第967期《火武耀揚》書名叫〈兄弟!我殺了你好嗎?〉,講兄弟鬩牆,佳哥同鐵紅仔誓置對方於死地,鬥到兩敗俱傷,佳哥穩操勝券後大放歪理,其中有兩句對白唔使對號入座,係直頭話緊班高官嘅。佳哥話:「乜你見到今Day香港話事嘅權貴係人咩?同盟教主講得好啱!人!越無恥,越無敵呀!」係囉,講得出甚麼「殺無赦」呀,甚麼「我覺得議會內外都不應該牽涉太多政治」之類嘅人形物體,唔知睇完今期《火武耀揚》有乜感覺呢?另,瑞新一向標榜血腥美學,今期佳哥撳實個鼻唔畀佢跌最後都甩鼻嗰幾格,真係好有創意,令人印象深刻。計番佳哥由出冊到死前後不過三四期,邱瑞新已可以將佢寫到如此有血有肉,編寫功力係高明嘅。 相關資訊瑞新又玩嘢!東方升亂入《火武耀揚》! (Jun 10, 2016) 邱瑞新加價 《火武耀揚》+《火紅年代黑骨棠》賣$19 (May 25, 2016)

Read more ›

《火武耀揚》巨咪三頁高三吋 佳哥復出歸邊赤柱同盟
by / on 16/04/2018 at 9:49 pm

《火武耀揚》巨咪三頁高三吋 佳哥復出歸邊赤柱同盟

《火武耀揚》呢幾期劇情都好緊湊吓,隨住林國魂迫到一哥要放重犯出監,華興會同赤柱同盟啲大佬輩正式交鋒。不過可能連邱瑞新都緊張過頭,搞到今期第964期旁白出錯呀喂。第六頁第一格寫「六尺三寸巨霸身軀,力貫精鋼──橫掃千軍!」第九頁第一格卻寫「巨咪六尺六寸,比自己還要高大健碩的怪獸,連巨咪也震驚!」三頁之間,巨咪竟然高咗六吋?哈哈,當然係手民之誤喇,下次要小心啲喇。另,埋尾都有個高潮位,赤柱同盟有個光頭佬出場,無記錯的話,應該係以前拜鐵紅門下嘅光頭幫一員,叫佳哥,但衰乜入冊呢,我就真係唔記得咗咯。 相關資訊《火武耀揚》林國魂導神通跳樓 單鳳唔係死咗咩? (Apr 27, 2016) The city is dying 邱瑞新與道理哥對談 (Mar 2, 2016)

Read more ›
黃光亮突入《火武耀揚》 單鳳劈友好堅揪
by / on 26/03/2018 at 9:15 pm

黃光亮突入《火武耀揚》 單鳳劈友好堅揪

翻睇今期第961期《火武耀揚》,無意中發現第十四頁,有疑似黃光亮突入油麻地江湖世界,而佢個角色應該係果欄員工,見到和記鐵頭勇帶隊劈友,嚇到碌大對眼呆咗。講番故事,呢三幾期劇情推進得好快,而我幾鍾意嘅角色「赤柱聯盟」單鳳都有出場,第二十頁同二十一頁幅跨頁構圖好靚,火鳳飛翔,盤旋狩獵,以和應單鳯劈友食菜咁食,希望之後佢有多啲發揮喇。話時話,勾魂今期都有出現,但只得個背脊粒爹都無,究竟瑞新幾時先揭開佢個面具以真面目示人?唔知點解,我硬係覺得佢係一個唔見咗好多期嘅舊角色…… 相關資訊邱瑞新好狠 《火武耀揚》八大將一期死清光 (Oct 9, 2015) 《火武耀揚》明寸政改 瑞新抽發叔水 (Jul 27, 2015)

Read more ›
《火武耀揚》汗青超重口味床上戲 道理哥終於醒番
by / on 25/01/2018 at 9:18 pm

《火武耀揚》汗青超重口味床上戲 道理哥終於醒番

今期第953期《火武耀揚》睇到我嘩嘩聲,邱瑞新久唔久就曬鹽花,呢招唔出奇,出奇在竟然如此重口味,安排汗青同一個肥婆交配,啲肢體動作仲要畫得極其露骨,甚麼五十路呀、肥痴女呀嘅日本怪癖類AV味道完全出晒嚟,我坐地鐵睇書,登時覺得有啲尷尬。今期除咗妖女搶眼外,丹心表現都唔差,估唔到佢手底功夫咁好,下下分筋銼骨,打到班新記爛仔斷手斷腳。咁當然,最震撼係道理哥醒番喇,我幾驚呢個角色以後都唔出場呀,你知喇,瑞新啲伏線有時伏伏吓會伏到無影架嘛。 相關資訊暴力王終於打柴 《火武耀揚》開新故事 (Feb 25, 2016) 《火武耀揚》久違了的妹頭與人西 (Dec 7, 2014)

Read more ›
別矣《火武耀揚》飛龍!一路好走!
by / on 13/12/2017 at 9:30 pm

別矣《火武耀揚》飛龍!一路好走!

塵歸歸,土歸土,飛龍注定做得一日新記龍頭就收皮,喺今期第947期《火武耀揚》正式魂歸天國,佢同忍哥一Friend番做番好兄弟就要上路,臨死千叮萬囑要忍哥捧丹心上位,唔好俾汗青拖垮新記。兩個大男人攬住喊兼死唔肯放手一幕,睇到我眼濕濕就呃你嘅,但睇到耳仔一熱卻係不爭事實。睇到中段,甚麼胸肺科首席專家、國家級氣功大師、西藏密宗大師齊集醫院,我仲有一絲希冀,希望可以同N年前火武明明已經心臟停頓都唔使死,嗰次係黑骨棠唔畀佢死,一齊捱心臟起搏器強大電流,硬生生將火武帶離鬼門關,可惜今次無呢支歌仔唱……唉!別矣飛龍!一路好走喇! 相關資訊非常突然!《火紅年代黑骨棠》完結So Sad! (Nov 7, 2016) 瑞新加油 《火紅年代黑骨棠》700期 (Apr 3, 2016)

Read more ›
《火武耀揚》震撼一期 跪求瑞新唔好整死飛龍
by / on 06/12/2017 at 11:01 pm

《火武耀揚》震撼一期 跪求瑞新唔好整死飛龍

久違了的激動,今期第946期《火武耀揚》睇到我好激動,忍哥呢個角色煲咗二十期左右,證明係煲得起嘅。睇完上期,原本諗住死嘅係佢,心底有啲Sad,點知今期一個屈尾十,死嘅居然係飛龍,仲要極諷刺地唔係被鐵頭勇一幫劈死,而係好唔覺意地俾差佬開槍殺死。下期直頭叫〈飛龍歸天〉,唔通大大話話出咗三四百期嘅新記第二把交椅真係要死得咁不明不白?唔知點解,心底下好唔捨得大環山飛龍打柴添。希望喇,我知機會甚渺茫,希望瑞新可以高抬貴手放佢一條生路喇,道理哥一槍爆面都唔死得,照計飛龍都可以嘅啫──呵? 相關資訊有片:超強手藝 報紙飛龍之誕生 (Oct 10, 2015) 《火武耀揚》下期起加價 每本$17 (Nov 26, 2014)

Read more ›

《火武耀揚》豪華珍藏版 Cut錯位睇唔到對白?
by / on 26/11/2017 at 5:55 pm

《火武耀揚》豪華珍藏版 Cut錯位睇唔到對白?

撐邱瑞新,買番豪華珍藏版《火武耀揚》創刊號嚟睇,坐茶餐廳一煲成個鐘,甚麼美好回憶返晒嚟。睇番先知自己無記性,莫過話唔記得萬國柱原型係萬梓良,就連故事由漫畫界年薪八百萬天皇巨星倪志榮被斬開始帶起,呢一幕我都唔記得,家陣睇番好有親切感。不過有樣嘢好想瑞新正視吓,頁與頁之間拼得太密喇,Cut位錯晒,好多接近書中間嘅畫面會無減忽,有時甚至連對白都睇唔到,有啲無癮囉。希望下期可以改進,瑞新加油,撐你呀。 相關資訊《火武耀揚》南京仔看透世局 香港人超勁 (Nov 14, 2014) 【編輯Blog】尉遲一:如此閃縮 不如不畫 (Nov 11, 2014)

Read more ›
瑞新《火武耀揚》豪華珍藏版 11月22日見街
by / on 08/11/2017 at 10:18 pm

瑞新《火武耀揚》豪華珍藏版 11月22日見街

終於出咗正式廣告嘞,喺今期第942期《火武耀揚》,邱瑞新寫明《火武耀揚》豪華珍藏版將於11月22日見街。全書144頁,燙金書套式封面,粉紙過膠精印,有埋昔日封面重溫咁話喎,每本$48。不過奇怪在,瑞新寫明成輯故事只得九冊,喂?唔打算由頭出到尾咩?出九冊咁少,個故事會去到邊停?其實最好就好似《古惑仔》咁重新出一次喇,硬生生Cut,儲書會儲得好無癮喎。 相關資訊《古惑仔》巨星之戰第二場 李成克打唔贏梁家仁? (Jun 10, 2018) 悼!《古惑仔》牛姑之死! (Jun 4, 2018)

Read more ›
李家鼎突入《火武耀揚》 煮好西畀小喬同飛龍喫
by / on 25/10/2017 at 9:54 pm

李家鼎突入《火武耀揚》 煮好西畀小喬同飛龍喫

《火武耀揚》呢十期八期劇情,都係圍住新記選暫代龍頭嚟講,帶出忍哥呢個角色我Like,汗青係敗家仔黐埋鐵頭勇唔出奇,而小喬係妖女呢條橋亦唔難估,係估唔到大選當前,小喬會同飛龍上醒爺私房菜食好西啫。今期第940期,唔使講到明,都知「醒爺」即係映射緊「鼎爺」李家鼎喇,如此這般小喬食滑飛龍,哄到佢爆湧,都勉強叫合情合理。其實久唔久出吓明星名人都幾過癮,總算畀到啲新鮮感讀者,不過話時話,如果唔好幅幅都用真人相執一執就落稿就更好,畀多啲心機自己勾鼎爺面相,會更加睇得出誠意所在囉。 相關資訊淺野忠信大犧牲 新髮型變三島平八 (Mar 24, 2015) 有牌爛仔終極體成形 柱過爆粗鬧放催淚彈 (Oct 22, 2014)

Read more ›
珍藏版《火武耀揚》11月推出 雙週刊隔周三見街
by / on 11/10/2017 at 3:09 pm

珍藏版《火武耀揚》11月推出 雙週刊隔周三見街

上周邱瑞新透露會復刻《火武耀揚》,今期第938期佢繼續喺「瑞新週記」爆料,話將會喺11月推出,雙周刊形式隔個禮拜三推出,第一輯暫定9期完交代晒完整故事,仲話已經有幾期存貨。今次……麻煩嘞,又要買多套珍藏版,屋企書櫃唔知仲夠唔夠位擺…… 相關資訊很想要吧?元祖高達/渣古八達通卡 嘟閘型過人 (Aug 18, 2016) 網圖分享:表態筆伐 港漫人的心聲(五) (Oct 15, 2014)

Read more ›
《火武耀揚》出豪華珍藏本 邱瑞新話撚到靚先出街
by / on 28/09/2017 at 2:21 pm

《火武耀揚》出豪華珍藏本 邱瑞新話撚到靚先出街

邱瑞新喺今期第936期《火武耀揚》「瑞新週記」爆料,話決定推出《火武耀揚》豪華珍藏本,佢咁寫:「《火武耀揚》整整寫咗十八年,邁向一千期,對呢本意義重大嘅作品,我無資格求其,而且責無旁貸,要再一次賦予佢無盡光輝同魅力。」仲話會不惜工本撚到靚一靚先見街。我呢,就當然贊成喇,原因有二:一,一本公仔書可以畫到十八年係好值得尊重嘅,而我亦睇足十八年,當買番份回憶都好;二,儲一本四期內容嘅珍藏本,從來好過逐期儲單行本,無咁阻掟吖嘛。 相關資訊《火武耀揚》明抽特首夫人水 無知!涼薄!冷血!刻毒! (Sep 25, 2014) 《火武耀揚》雷公女朋友係波多野結衣? (Aug 20, 2014)

Read more ›

瑞新玩咁大?一槍啪低道理哥?
by / on 10/05/2017 at 10:13 pm

瑞新玩咁大?一槍啪低道理哥?

非常突然!今期第916期《火武耀揚》書名明明叫〈怒斬嗱B〉,但嗱B無俾汗青斬死走得甩,反而死嗰個係……新記龍頭道理哥?唔係啩,邱瑞新真係咁夠薑整死呢個一線角色?睇到道理哥俾槍指住太陽穴嗰一格,雖然爆晒血,但我都仲係咁諗:「掀起高潮啫,瑞新實有計扭橋,死都可以拗番生嘅。」但再揭多頁睇埋下期預告,書名Exactly就叫〈道理哥之死〉,我completely心寒嘞。唔好喇,我好Like王道良呢個角色架,仲要死得咁求其一槍就俾人啪低,就算要死,都可唔可以死得有型啲?身邊朋友好陰謀論咁話:「無端端整死個咁重要嘅角色,會唔會係瑞新想整個小高潮,然後順便Cut埋《火武耀揚》,叫做有頭有尾咁呀?」吓?唔好喇。 相關資訊輕量級複製道《火武耀揚》幾個門生同一面相 (Aug 13, 2014) 瑞新創作 《火武耀揚》封面 祝讀者一路好走 (Jul 10, 2014)

Read more ›
《火武耀揚》加價至$20 汗青究竟幾多歲Die?
by / on 26/01/2017 at 9:00 pm

《火武耀揚》加價至$20 汗青究竟幾多歲Die?

剛剛睇完901-902期新春合併號《火武耀揚》,有兩樣嘢想講。一,瑞新喺書末話:「農曆年假期順延一星期,二月八日星期三隆重出版,調整售價,每冊二十元正。」終於同其他港漫睇齊賣$20,瑞新加價都算加得遲咯,一蚊唔夠下午茶餐A加杯凍飲,我決定繼續撐,唔知大家點睇。二,捉錯處,故事講到道理哥帶漏口仔拜汗青,靈位明明寫住「生於一九七四年六月十日,死於一九八二年九月九日,愛兒王汗青之靈位」,但書中汗青回憶一段又有對白寫:「我得十歲……得十幾咋。」照計1982-1974=8,即係話汗青應該得8歲就魂歸天國,睇怕瑞新一時唔為意,計錯數。 相關資訊港漫均一價$20 《西遊》113期開始加$1 (Aug 4, 2017) 玉皇朝加價 《新著龍虎門》+《皇朝君臨》下期$20 (Apr 29, 2017)

Read more ›
樣惡但心地好 瑞新八號波義載路人抵讚
by / on 04/11/2016 at 10:00 am

樣惡但心地好 瑞新八號波義載路人抵讚

N年前訪問過邱瑞新,為佢本《董先生:中產階級大屠殺》宣傳,記得初見面,佢係擔住口煙嘅,當時我真係咁諗:「嘩,乜個樣咁惡,咁似黑社會?」之後傾落,越傾越發覺佢好友善,好鍾意笑,粗口就無得免架嘞,但毫無架子亦係事實,予人感覺好真,係有嗰句講嗰句嗰類人。之所以佢喺今期第889期《火武耀揚》專欄「瑞新週記」講述上個禮拜八號風球開車義助路人一事,我完全唔感覺得意外,成件事好切合佢性格…… 相關資訊《火紅年代黑骨棠》 Beyond做封面 (Jul 5, 2014) 港漫情報:照賣$15,瑞新宣佈唔加價! (Jun 26, 2014)

Read more ›
邱瑞新出《火武耀揚》珍藏本?出新書好過喇!
by / on 29/09/2016 at 11:45 pm

邱瑞新出《火武耀揚》珍藏本?出新書好過喇!

邱瑞新喺今期第884期《火武耀揚》「瑞新週記」透露:「……瑞新近期都著力緊另一件事,就係重溫《火武耀揚》創刊號嘅故事,而且已經部署剪輯同修改,準備推出一本真係極具紀念價值嘅珍藏本……」瑞新Under新帝國牌頭嘅作品好多,而《火武耀揚》又由1999年連載至今,將之復刻亦無可厚非,不過純個人意見,不喜勿插,既然有心搞壇大嘢,點解唔考慮出多本新書?我諗以「邱瑞新」三個字,始終有一定號召力,實有好多讀者捧場喎。驚編唔切畫唔切?出類似《新著龍虎門外傳之皇者之路》咁上下書度嘅雙週刊又得唔得?兩個禮拜出一本,得嘞啩?Fine,如果硬係要推出珍藏本,又可唔可以復刻《耀武揚威》、《火武英雄》或者《紅棍王》?呢三本書我反而更加有興趣囉。 相關資訊《火武耀揚》黑骨棠患癌 瑞新整死第一男主角? (Jun 18, 2014) 瑞新誠邀讀者客串 同秋哥做對手戲 (Mar 28, 2014)

Read more ›