Post Tagged with: "邱瑞新"

《火武耀揚》震撼一期 跪求瑞新唔好整死飛龍
by / on 06/12/2017 at 11:01 pm

《火武耀揚》震撼一期 跪求瑞新唔好整死飛龍

久違了的激動,今期第946期《火武耀揚》睇到我好激動,忍哥呢個角色煲咗二十期左右,證明係煲得起嘅。睇完上期,原本諗住死嘅係佢,心底有啲Sad,點知今期一個屈尾十,死嘅居然係飛龍,仲要極諷刺地唔係被鐵頭勇一幫劈死,而係好唔覺意地俾差佬開槍殺死。下期直頭叫〈飛龍歸天〉,唔通大大話話出咗三四百期嘅新記第二把交椅真係要死得咁不明不白?唔知點解,心底下好唔捨得大環山飛龍打柴添。希望喇,我知機會甚渺茫,希望瑞新可以高抬貴手放佢一條生路喇,道理哥一槍爆面都唔死得,照計飛龍都可以嘅啫──呵? 相關資訊瑞新《火武耀揚》豪華珍藏版 11月22日見街 (Nov 8, 2017) 《火武耀揚》林國魂導神通跳樓 單鳳唔係死咗咩? (Apr 27, 2016)

Read more ›

《火武耀揚》豪華珍藏版 Cut錯位睇唔到對白?
by / on 26/11/2017 at 5:55 pm

《火武耀揚》豪華珍藏版 Cut錯位睇唔到對白?

撐邱瑞新,買番豪華珍藏版《火武耀揚》創刊號嚟睇,坐茶餐廳一煲成個鐘,甚麼美好回憶返晒嚟。睇番先知自己無記性,莫過話唔記得萬國柱原型係萬梓良,就連故事由漫畫界年薪八百萬天皇巨星倪志榮被斬開始帶起,呢一幕我都唔記得,家陣睇番好有親切感。不過有樣嘢好想瑞新正視吓,頁與頁之間拼得太密喇,Cut位錯晒,好多接近書中間嘅畫面會無減忽,有時甚至連對白都睇唔到,有啲無癮囉。希望下期可以改進,瑞新加油,撐你呀。 相關資訊邱瑞新好狠 《火武耀揚》八大將一期死清光 (Oct 9, 2015) 《火武耀揚》明寸政改 瑞新抽發叔水 (Jul 27, 2015)

Read more ›
李家鼎突入《火武耀揚》 煮好西畀小喬同飛龍喫
by / on 25/10/2017 at 9:54 pm

李家鼎突入《火武耀揚》 煮好西畀小喬同飛龍喫

《火武耀揚》呢十期八期劇情,都係圍住新記選暫代龍頭嚟講,帶出忍哥呢個角色我Like,汗青係敗家仔黐埋鐵頭勇唔出奇,而小喬係妖女呢條橋亦唔難估,係估唔到大選當前,小喬會同飛龍上醒爺私房菜食好西啫。今期第940期,唔使講到明,都知「醒爺」即係映射緊「鼎爺」李家鼎喇,如此這般小喬食滑飛龍,哄到佢爆湧,都勉強叫合情合理。其實久唔久出吓明星名人都幾過癮,總算畀到啲新鮮感讀者,不過話時話,如果唔好幅幅都用真人相執一執就落稿就更好,畀多啲心機自己勾鼎爺面相,會更加睇得出誠意所在囉。 相關資訊有片:超強手藝 報紙飛龍之誕生 (Oct 10, 2015) 淺野忠信大犧牲 新髮型變三島平八 (Mar 24, 2015)

Read more ›
珍藏版《火武耀揚》11月推出 雙週刊隔周三見街
by / on 11/10/2017 at 3:09 pm

珍藏版《火武耀揚》11月推出 雙週刊隔周三見街

上周邱瑞新透露會復刻《火武耀揚》,今期第938期佢繼續喺「瑞新週記」爆料,話將會喺11月推出,雙周刊形式隔個禮拜三推出,第一輯暫定9期完交代晒完整故事,仲話已經有幾期存貨。今次……麻煩嘞,又要買多套珍藏版,屋企書櫃唔知仲夠唔夠位擺…… 相關資訊很想要吧?元祖高達/渣古八達通卡 嘟閘型過人 (Aug 18, 2016) 《火武耀揚》久違了的妹頭與人西 (Dec 7, 2014)

Read more ›
《火武耀揚》出豪華珍藏本 邱瑞新話撚到靚先出街
by / on 28/09/2017 at 2:21 pm

《火武耀揚》出豪華珍藏本 邱瑞新話撚到靚先出街

邱瑞新喺今期第936期《火武耀揚》「瑞新週記」爆料,話決定推出《火武耀揚》豪華珍藏本,佢咁寫:「《火武耀揚》整整寫咗十八年,邁向一千期,對呢本意義重大嘅作品,我無資格求其,而且責無旁貸,要再一次賦予佢無盡光輝同魅力。」仲話會不惜工本撚到靚一靚先見街。我呢,就當然贊成喇,原因有二:一,一本公仔書可以畫到十八年係好值得尊重嘅,而我亦睇足十八年,當買番份回憶都好;二,儲一本四期內容嘅珍藏本,從來好過逐期儲單行本,無咁阻掟吖嘛。 相關資訊《火武耀揚》南京仔看透世局 香港人超勁 (Nov 14, 2014) 【編輯Blog】尉遲一:如此閃縮 不如不畫 (Nov 11, 2014)

Read more ›
瑞新玩咁大?一槍啪低道理哥?
by / on 10/05/2017 at 10:13 pm

瑞新玩咁大?一槍啪低道理哥?

非常突然!今期第916期《火武耀揚》書名明明叫〈怒斬嗱B〉,但嗱B無俾汗青斬死走得甩,反而死嗰個係……新記龍頭道理哥?唔係啩,邱瑞新真係咁夠薑整死呢個一線角色?睇到道理哥俾槍指住太陽穴嗰一格,雖然爆晒血,但我都仲係咁諗:「掀起高潮啫,瑞新實有計扭橋,死都可以拗番生嘅。」但再揭多頁睇埋下期預告,書名Exactly就叫〈道理哥之死〉,我completely心寒嘞。唔好喇,我好Like王道良呢個角色架,仲要死得咁求其一槍就俾人啪低,就算要死,都可唔可以死得有型啲?身邊朋友好陰謀論咁話:「無端端整死個咁重要嘅角色,會唔會係瑞新想整個小高潮,然後順便Cut埋《火武耀揚》,叫做有頭有尾咁呀?」吓?唔好喇。 相關資訊有牌爛仔終極體成形 柱過爆粗鬧放催淚彈 (Oct 22, 2014) 網圖分享:表態筆伐 港漫人的心聲(五) (Oct 15, 2014)

Read more ›

《火武耀揚》加價至$20 汗青究竟幾多歲Die?
by / on 26/01/2017 at 9:00 pm

《火武耀揚》加價至$20 汗青究竟幾多歲Die?

剛剛睇完901-902期新春合併號《火武耀揚》,有兩樣嘢想講。一,瑞新喺書末話:「農曆年假期順延一星期,二月八日星期三隆重出版,調整售價,每冊二十元正。」終於同其他港漫睇齊賣$20,瑞新加價都算加得遲咯,一蚊唔夠下午茶餐A加杯凍飲,我決定繼續撐,唔知大家點睇。二,捉錯處,故事講到道理哥帶漏口仔拜汗青,靈位明明寫住「生於一九七四年六月十日,死於一九八二年九月九日,愛兒王汗青之靈位」,但書中汗青回憶一段又有對白寫:「我得十歲……得十幾咋。」照計1982-1974=8,即係話汗青應該得8歲就魂歸天國,睇怕瑞新一時唔為意,計錯數。 相關資訊港漫均一價$20 《西遊》113期開始加$1 (Aug 4, 2017) 玉皇朝加價 《新著龍虎門》+《皇朝君臨》下期$20 (Apr 29, 2017)

Read more ›
非常突然!《火紅年代黑骨棠》完結So Sad!
by / on 07/11/2016 at 8:35 pm

非常突然!《火紅年代黑骨棠》完結So Sad!

事忙,上周四出版嘅《火紅年代黑骨棠》,我剛剛先有時間睇,習慣先睇「瑞新週記」先嘅,睇完,好無心機睇內文,因為瑞新掉低咗幾句說話:「緣份有聚有散!瑞新響度向大家正式宣佈:下期《火紅年代》係最終回!即係故事暫完停刊!緣來緣去,自有天意!希望下期《火紅年代》嘅圓滿結局篇,可以與你共同渡過,成為瑞新同你嘅珍貴回憶之一!多謝!」呢下真係非常突然,好好哋點解要停刊? 相關資訊輕量級複製道《火武耀揚》幾個門生同一面相 (Aug 13, 2014) 《火紅年代黑骨棠》 Beyond做封面 (Jul 5, 2014)

Read more ›
樣惡但心地好 瑞新八號波義載路人抵讚
by / on 04/11/2016 at 10:00 am

樣惡但心地好 瑞新八號波義載路人抵讚

N年前訪問過邱瑞新,為佢本《董先生:中產階級大屠殺》宣傳,記得初見面,佢係擔住口煙嘅,當時我真係咁諗:「嘩,乜個樣咁惡,咁似黑社會?」之後傾落,越傾越發覺佢好友善,好鍾意笑,粗口就無得免架嘞,但毫無架子亦係事實,予人感覺好真,係有嗰句講嗰句嗰類人。之所以佢喺今期第889期《火武耀揚》專欄「瑞新週記」講述上個禮拜八號風球開車義助路人一事,我完全唔感覺得意外,成件事好切合佢性格…… 相關資訊《火武耀揚》明抽特首夫人水 無知!涼薄!冷血!刻毒! (Sep 25, 2014) 《火武耀揚》雷公女朋友係波多野結衣? (Aug 20, 2014)

Read more ›
邱瑞新出《火武耀揚》珍藏本?出新書好過喇!
by / on 29/09/2016 at 11:45 pm

邱瑞新出《火武耀揚》珍藏本?出新書好過喇!

邱瑞新喺今期第884期《火武耀揚》「瑞新週記」透露:「……瑞新近期都著力緊另一件事,就係重溫《火武耀揚》創刊號嘅故事,而且已經部署剪輯同修改,準備推出一本真係極具紀念價值嘅珍藏本……」瑞新Under新帝國牌頭嘅作品好多,而《火武耀揚》又由1999年連載至今,將之復刻亦無可厚非,不過純個人意見,不喜勿插,既然有心搞壇大嘢,點解唔考慮出多本新書?我諗以「邱瑞新」三個字,始終有一定號召力,實有好多讀者捧場喎。驚編唔切畫唔切?出類似《新著龍虎門外傳之皇者之路》咁上下書度嘅雙週刊又得唔得?兩個禮拜出一本,得嘞啩?Fine,如果硬係要推出珍藏本,又可唔可以復刻《耀武揚威》、《火武英雄》或者《紅棍王》?呢三本書我反而更加有興趣囉。 相關資訊瑞新創作 《火武耀揚》封面 祝讀者一路好走 (Jul 10, 2014) 港漫情報:照賣$15,瑞新宣佈唔加價! (Jun 26, 2014)

Read more ›
瑞新又玩嘢!東方升亂入《火武耀揚》!
by / on 10/06/2016 at 10:00 pm

瑞新又玩嘢!東方升亂入《火武耀揚》!

一早知瑞新係好關心時事嘅人,透過漫畫月旦政治係佢強項,今期《火武耀揚》佢又發功嘞,今次直頭將毛記東方升畫入漫畫,配對白謂:「嘩!我地偉大祖國嘅一帶一路工程又有新發展!要娼有娼,要炮有炮!呢種為國捐精嘅精神,真係值得我東方升欽敬。」寸緊邊壇嘢?畫公仔唔使畫出腸,瑞新,你係得嘅!我Like呀! 相關資訊《火武耀揚》黑骨棠患癌 瑞新整死第一男主角? (Jun 18, 2014) 瑞新誠邀讀者客串 同秋哥做對手戲 (Mar 28, 2014)

Read more ›

邱瑞新加價 《火武耀揚》+《火紅年代黑骨棠》賣$19
by / on 25/05/2016 at 9:45 pm

邱瑞新加價 《火武耀揚》+《火紅年代黑骨棠》賣$19

《火武耀揚》同《火紅年代黑骨棠》拖到依家先加價,算係咁咯,每本加到$19,同《鐵將縱橫》看齊。加價原因,「瑞新週記」咁話:「講真!對仍然熱情捧場又出錢購買嘅讀者而言,向你地爭取每期多兩蚊使費,對你有點不公,而我有點慚愧!但喺讀者人數不變,而銷路變嘅情況之下,瑞新無奈地無其他方法,我唯一可以做到嘅係更加俾心機,更加倍用心創作,回饋最好嘅港漫娛槳俾讀者朋友們。」其實計我話,兩蚊直頭加得少喇,估計真心讀者唔會為呢區區兩蚊而放棄捧場,努力加油喇瑞新。不過話時話,小弟有一個問題,點解第865期《火武耀揚》期名咁特別嘅?《雲中 霧中 霜雪中》下面,仲有小字寫住「青雲Sir被林國魂邗教魅力感染」,植錯字?唔覺意當期名一齊出咗?有無人答到我? 相關資訊《山海逆戰》54期出特別版 3D立體海報+專刊$68超抵 (Nov 9, 2017) 《山海逆戰》搞Gag? 伯益係首個用髮泥嘅人? (Sep 19, 2017)

Read more ›
瑞新加油 《火紅年代黑骨棠》700期
by / on 03/04/2016 at 6:15 pm

瑞新加油 《火紅年代黑骨棠》700期

唔講唔覺,原來《火紅年代黑骨棠》已經出到700期,喺呢個紙媒步入夕陽嘅年代,一本公仔書可以連載到700期,總算係一個值得鼓舞嘅里程碑。有人話瑞新拖橋又犯駁,打來打去都係嗰幾兜友,又話乜又話物,呢啲嘢我係統統唔理嘅,你話我傻仔都好,我認我係盲撐港漫嗰批死忠,老實講只要睇得明,公仔唔畫得太過份,呢十七蚊我一定畀瑞新賺嘅。瑞新喺今期序言咁寫:「未知的前路是困難的,但路仍要繼續,心仍要熱血!尤其有你!親愛長情的讀者在遙遠的地方看顧我們,愛惜屬於我們香港人的港漫!」無錯,真係希望多啲人識得珍惜「屬於我們香港人的港漫」,瑞新,加油呀。 相關資訊《火紅年代黑骨棠》600期 睇賀畫 (May 1, 2014) 李志清筆下的黑骨棠 (Mar 26, 2014)

Read more ›
The city is dying 邱瑞新與道理哥對談
by / on 02/03/2016 at 9:00 pm

The city is dying 邱瑞新與道理哥對談

雖則好多人話《火武耀揚》拖橋,五大天王講成二三百期先捨得完,但邱瑞新有樣嘢同牛佬一樣,係好值得敬佩嘅──敢言。今期第854期《火武耀揚》無咗開書版頭畫,換來嘅係瑞新同尖東之王道新記坐館道理哥對談,談話內容圍繞依家香港局面,結論係──「東方之珠已經褪色!我最怕係佢會時光倒流,返番六十年代,The City is dying。」返番六十年代又點?六十年代香港係未成立ICAC嘅,咁你可以想像係點嘞。之後語帶雙關,將故事重新納入赤柱同盟打大Boss林國魂身上。就係呢種表態,我會Keep住每個禮拜繼續畀$17瑞新賺。 相關資訊支持牛佬決定!佐維同趙繼邦攬住上路! (Dec 8, 2017) 《古惑仔》搞Gag 牛佬想整死佐維同立花? (Nov 27, 2017)

Read more ›
《火武耀揚》下期起加價 每本$17
by / on 26/11/2014 at 10:00 pm

《火武耀揚》下期起加價 每本$17

邱瑞新曾經喺第766期《火武耀揚》話過:「漫畫加價!不過無新帝國份,一來無行家探問我意見,二來我暫時亦無加價壓力。」此一時彼一時,家陣「暫時」變「過時」,下期《火武耀揚》會正式加價至每本$17。 相關資訊【有片】日本教委會堅離地 蔬菜加價小學停膳食兩日 (Nov 4, 2016) 牛佬又創先河 《古惑仔》加價至$20 (Aug 11, 2016)

Read more ›