一個紙箱已經足以令喵星人好`興奮，而家仲要一次過50個，見到都爽死！外國有貓奴用50個紙箱砌成呢個迷宮陣，中間仲有門可以通過每個紙箱，睇片見兩隻喵星人玩得勁開心，不如開返個貓party招咪埋朋友啦。BTW，隻黑貓鐘意反傳統，最終都係喺啲紙箱上面行嚟行去，好古惑。 相關資訊貓奴勁羨慕 喵星人瞓衫內超可愛 (Sep 23, 2017) 【有片】日本屋中屋帳篷 自製私人空間唔駛1千蚊 (Sep 22, 2017)

Parkour影片唔係未睇過，啲景幾靚都好，幾好身手都好，齋跳齋打觔斗始終有啲悶，之所以YouTube頻道「UrbanAmadei」會加入喪屍元素。主觀鏡由頭帶到尾，由住宅單位俾喪屍攻擊開始，一直跳落街、跳樓梯、跳屋頂、跳天橋，最後跳上私家車成功逃走。有故事性，成條片當堂唔同晒，緊張刺激好多，睇嗰個都投入好多，正呀喂。 相關資訊【有片】職業Free runner回到古代 挑戰日本武士、忍者 (Sep 18, 2017) 【有片】超靚景！比卡超玩PARKOUR 鏡頭背後睇見都痛 (Jun 28, 2017)

YouTube頻道「The Slow Mo Guys」今次簡單啲，玩充氣谷爆足球同欖球。唔知點解爆波個畫面，令我聯想到破人體而出嘅異形，卜一聲，好彩裏面無爆腸，不過爆內膽一樣壯觀。 相關資訊【有片】吉祥物謎之儀式 日本足球隊進軍世界盃決賽周 (Aug 31, 2017) 【其實係個波】日本喵星人變身前後 勁似足球Twitter熱傳 (Jun 17, 2017)

愛無分界限，唔信可以睇睇YouTube頻道「MacGyver the Lizard」，MacGyver係一隻寵物蜥蜴（Argentine Red Tegu lizard），而主人造型就有啲似《IQ博士》裡面嘅草菇。草菇主人聲稱MacGyver就好似一般寵物狗咁，聰明可愛兼識聽自己個名，會跟住佢周圍食玩訓。從短片所見，MacGyver有呎幾長，估計都幾重身，抱上手應該幾攰，不但有衫著，仲有無限量水果食，招積到連刺身都可以擺入口，而伏喺主人膊頭瞇起眼就嚟訓著嘅表情，仲有啲撒嬌Feel添，呢隻蜥蜴真識嘆。 相關資訊有片：超勁煎Pancake！正面LeBorn反轉咖喱仔！ (Jun 27, 2016) 【新片速報】浣熊有義氣 合力爬牆影片YouTube熱播 (Jun 24, 2016)

好葡萄！崔成安對劉萬梁師父真係好，成日畫親筆畫送畀佢，之前已經見過幾幅，啱啱又有兩幅新作嘞，真係羨慕死人。唔係求其亂畫架，幅幅都跟足劉萬梁師父面相畫，姿勢動作固然似，眼神表情亦有神髓，崔成安手畫真係無懈可擊。講番劉萬梁師父，除咗耍雙截棍厲害外，佢仲有一個優點──靚仔！唔係吹水，有相為證，你可以話啲相影得好Chok，但事實係唔係人人都Chok得起；功夫呢？口講無憑，可以上YouTube搵佢啲片睇睇，黑暗中舞螢光雙截棍，堪稱型到一個點。 相關資訊《雙節棍連環圖譜》新書簽名會 買書抽獎送崔成安原稿 (Sep 18, 2017) 有片：崔成安《雙節棍連環圖譜》短片 劉萬梁師傅好像真 (Aug 28, 2017)

好耐無睇過YouTube頻道「The Slow Mo Guys」，今次啲慢鏡頭係好好好好好搞笑嘅，因為有人刻意食波餅！皮球近距離Hit中右邊面頰嘅結果係──先係塊面扁咗，皮膚好似波浪咁震咗幾震，繼而鼻骨好似歪咗向橫擺咗一擺，嘴唇因為衝力硬生生爆開又合番埋，好似走咗位咁……總之就五官完全扭曲，完全變咗另一個人，隔住個Mon都Feel到嗰種痛。 相關資訊【有片】水瀨仔餵食影片YouTube熱爆 超可愛食到一臉都係 (Jun 20, 2016) 【有片】YouTube教整動漫食物 蛋黃哥/東京喰種/巨人出動 (Jun 19, 2016)

YouTube頻道「Dudesons」班友仔好鍾意玩自虐遊戲，今次鬥唔准眨眼，雞蛋、仙人掌、拳套極速飛到面前，雖然明知中間隔咗一塊厚厚透明膠板，明知唔會砸到去面，明知唔會構成危險，但眨眼實在係人類自然反應，結果無一個人能夠成功瞪大對眼，全部Fail接受大懲罰。大懲罰係捱轟，兩條友仔排排企，唔准郁，靚女手執氣槍→瞄準→校砲→發射，聽聲好響，轟到兩人成身灰泥沙塵，唔知痛唔痛嘅呢？我估痛，不過佢哋死忍爛忍，忍得住。 相關資訊【有片】召喚儀式成功？日本網民自製方法抽《A3！》SSR「有栖川誉」 (Sep 14, 2017) 新片速報 聖哥格鬥傳《Fight Of Gods》佛祖 VS 耶穌 (Sep 5, 2017)

悶悶哋，我會Click入YouTube頻道「Joseph’s Machines」。今次嘅偉大發明「Sauce Squirter」，姑且譯做唧醬汁機，方法係將芥蘭醬樽同茄汁樽綁實座檯扇扇葉，底下放四隻熱狗，咁一撻風扇咯喎，樽裡面嘅醬汁受離心力影響，紛紛唧向熱狗，阿Joseph都醒呀，事先整咗個紙皮框框，醬汁無話唧到一屋都係。記得睇埋尾Making of，有打爛玻璃花樽、醬汁唧入眼等鏡頭，仲好笑！ 相關資訊【有片】日本超肥美熱狗腸 可愛柴犬爛瞓片Twitter熱傳 (Apr 12, 2017) 【犯規】日本「黑毛和牛燒肉熱狗」賣300円 京都車站附近有得食 (Mar 25, 2017)

久唔久我就會睇吓YouTube頻道「drawholic」，啲畫作真係靚到一個點。先勁在唔使起稿，再勁在由眼睛而唔係面形開始畫起，再三勁在連背景幅窗簾都好細緻地畫埋，一個像真度超高嘅子瑜就躍然紙上。唔詳細睇，仲以為係一幅相，厲害。 相關資訊有片：疑似成口血！外國版電鑽食栗米！ (May 31, 2016) 有片：日本網民教整Mini杯麵 有齊麵條+蝦米+蛋粒+肉碎+蔥花 (May 25, 2016)

擲水樽有乜好玩呀？YouTube頻道「How Ridiculous」就係咁Ridiculous，將個水樽由地面拋上天橋扶手、廣告牌、燈柱、路標等等等等，又高又遠難度超高，少啲手力、眼界同最重要嘅運氣都唔得。雖然知道有無數NG，但見到成班大男人咁認真玩埋啲小學雞嘢，都OK睇得人開心嘅。弊，越睇越手痕，我都想過吓手癮添，但又驚俾街坊鬧，俾警察叔叔捉…… 相關資訊有片：Lego控必睇！路軌穿屋過後花園！感覺似揸火車！ (Apr 28, 2016) 有片：癲嘅！同鱷魚仔Kiss！咬唇痛人心！ (Apr 27, 2016)

好鍾意睇YouTube頻道「drawholic」，堪稱神乎其技，今次畫《進擊之巨人》，打爆城牆隻手畫得好有力，巨人面相好猙獰，好有爛肉感覺，嘴巴噴出嚟嘅煙畫亦得好有層次感，加上塵土飛揚，整體構圖係好有霸氣嘅。我仲留意到一樣嘢，如果無睇錯的話，呢幅畫係用蠟筆畫嘅，事關作者拎上手嗰陣，幅畫向下墜咗一墜，名副其實嘅重量感十足。 相關資訊有片：打鼓打出顏色 五顏六色好治癒 (Apr 27, 2016) 有片：256支蠟筆變實體花樽！插得花企得穩！ (Apr 21, 2016)

YouTube頻道叫「Joseph’s Machines」，驚世發明叫Tooth Brusher，以為有乜機械嘢咁巴閉喇，原來純粹得啖笑。而事實上呢個鬍鬚仔又真係幾搞笑，居然無聊到將大一大個又硬又重、定時定候有隻雀仔捐出嚟報時嘅古老掛牆鐘綁吓頭頂，再用鐵鏈將大鐘鎖住條頸，藉以自製一支自動牙刷。點自動法？原理係利用鐘擺嘅左搖右擺帶動牙刷，幫自己刷牙，兼校定時間，兩分鐘後雀仔會彈出嚟畀鎖匙佢開鎖。雖然明知大鐘失靈雀仔失蹤無得開鎖呢Part做假，搞到要無奈地刷牙刷足一粒鐘，雖然呢個驚世發明真係勁無聊，不過可能笑點低，我真係笑得出。 相關資訊【新片速報】喵星人原來鍾意電動牙刷 瘋狂刷個樣勁爽 (Sep 18, 2016) 有片：宇宙Gem毛毛蟲裙 梅麗史翠寶/老佛爺齊嗌頂唔順 (Apr 12, 2016)

痴線的！YouTube頻道「Dudesons」出名玩得癲，經常透過自殘呃Like，呢次仲癲到玩撳釘，誓要唔見血唔收手。玩法係搵個「死士」跳彈床，彈彈吓之際，側邊有人撒出大量撳釘，然後死士改跳為「Belly Flop」，即「肚皮先落」，簡單啲講即係撻生魚咁撻，霎時間，無數撳釘直刺入胸膛、肚皮、手手腳腳，痛到面容扭曲……但見死士逐粒撳釘扯番出嚟，隔住個Mon都感覺到痛，真係好痛。 相關資訊有片：恐怖！靚女Selfie惹鬼攞命！ (Apr 11, 2016) 【新片速報】貓奴必睇 喵星人想成名 自拍短片6千萬點擊熱爆 (Apr 8, 2016)

是日推介YouTube頻道「KayPikeFashion」，點解要睇？一，因為人體彩繪藝術家Kay Pike嘅化妝技術實在出神入化，實非一般Cosplayer可比，佢專拍片教人彩繪漫畫角色，小丑女、閃電俠、死侍、毒藤女等等等等，出嚟嘅效果勁有漫畫味，佢戙企唔郁，你會以為望到嘅係一張漫畫稿件，而唔係真人；二，佢夠膽起用──自己做Model，而佢本身樣子唔差，身材更加好到加零一，所以條條教學片都洶湧澎湃，實在無乜辦法唔睇多兩眼…… 相關資訊【圖集】神級幾何抽象圖案 比卡超/死侍越睇越暈 (Jun 14, 2017) 【相集】閃電俠殺入日本街頭 同fans影相咬頸巾煲煙 (Jan 10, 2017)

YouTube頻道「The Slow Mo Guys」今次自製一場空難，放心，無人傷亡，因為飛機係玩具機，而城堡係用Lego砌嘅。估唔到慢鏡重播撞機一瞬，原來畫面都幾震撼，啲Lego散到一地都係，城堡完全摧毀；未夠喉，主持人仲喺飛機殘骸淋火水，之後點火，一燒，篷一聲，成架飛機爆開完全解體，做戲做全套，又拍得幾有心思喎。 相關資訊自製LEGO求職公仔搵工 超正設計不計成本 (Sep 22, 2017) 【有片】LEGO版《Grand Theft Auto》 撞散晒啲人仔 (Sep 8, 2017)